Марий Турек район Мариец посёлкысо кыдалаш школым тунемын пытарымыж деч вара Мария Семеновам, ӱдыр фамилийже Прокопьева, комсомол путёвко дене Арбор кандашияш школыш старший пионервожатыйлан колтеныт. Тиде 1965 ийыште лийын. Мо оҥайже, паша корныжо «Келшымаш тулото» дене ик ийыште тӱҥалын, тылеч вара Мария Васильевна самырыкше годым вожатый, а ийла эртымеке, эн пагалыме уна семын кажне ийын Пионерийын кечыже лӱмеш ылыжтыме костёр деке вашка. Каласыман, «Келшымаш тулото» – пошкудо Татарстан Республикын Ципья, Киров областьын Ральники да Марий Элын Арбор школласе пионер организаций-влакын эн чапле йӱлашт таче мартеат ила. Кумшо тулотым Арбор школын Александр Матросов лӱмеш дружине эртарен. Мария Васильевна пионер да октябрёнок-шамычым ты пашашке ушен, курыкышко «Келшымаш» – «Дуслык» – «Дружба» лозунгым возаш чыланат кӱ падыраш-влакым погеныт. Участник-влаклан 312 канде пилоткым ургеныт.
– Кунам канымем омат шарне. Эрдене 7 шагатат 40 минутлан школ радиоузел гоч чыланат «Пионерская зорька» передачым колыштынна. Кажне рушарнян Каныш кече клубым эртаренна. Тылзылан ик гана курчак театрна спектакльым ончыктен, курчак-влакым почто гоч наледенна, сценарийым шкеак возенам. Мыняр шуко пайдале паша ышталтын! – шарналта Мария Васильевна.
1975 ий гыч вожатый М. Семенован вуйлатыме пионер дружиныже районышто веле огыл, республикыштат правофланговыйлан шотлалтын. Чолга пионервожатыйым туныктышо-влакын III республиканский съездышкышт сайленыт. Ленинский комсомоллан 60 ий темме лӱмеш тудлан «Артек» всесоюзный пионер лагерьыш путёвкым кучыктеныт.
М.В.Семенова школышто 40 ийым тыршен, тышеч 23 ийже пионервожатый, 11 ий директорын туныктымо да воспитаний шотышто алмаштышыже лийын. Педагогический пашан ветеранже, Калык просвещенийын отличникше, 75 ияш ийготшым ончыде, кум лукан йошкар галстукым тачат куанен, шӱм вургыжын шӱешыже кылда. Теве шукерте огыл Диана уныкаж дене «Мыйын еш архивем» республикысе конкурсыш ушнен да 100 ий ончыч шочшо пионер организацийын эн ончыл пионерже улмым пеҥгыдемден. А чапле юбилейым тудо 19 майыште Йошкар-Олаште ончычсо да кызытсе пионер-влак коклаште вашлиеш.
Л.СЕМЕНОВА
Фотом М.В.Семенован еш альбомжо гыч налме
