2027 ийыште Йошкар-Олаште тӱзатышаш вер-влакым ойырен налме.
Рӱдоласе общественный комитет
калыкын темлыме объектше-влакым ончен. Чылаже 25 темлымаш пурен. Тушечын кудытшым ойырен налыныт да йӱклымашке пуртеныт:
- Никонов лӱмеш площадь.
- Воинов-десантник-влакын скверышт.
- Зоя Космодемьянская уремын чётный могырыштыжо тротуар (130-шо ден 132-шо № — ан пӧрт-влак кокласе корно гыч Иверский Юмынаван юмоҥажын Храмже марте).
- Карл Маркс уремысе 101а ден 103-шо № — ан пӧрт кокласе кундем да Парковый (Вантовый) кӱвар.
- Пӱнчер ото кундем: Сталинград кредалмашын Геройжо-влак уремысе 100-шо № — ан пӧрт гыч тӱҥалын «лӱмдымӧ пашма» марте.
- Машиностроитель уремын чётный могырыштыжо тротуар (Садовый урем гыч Строитель урем марте).
Проект «Оласе кумдыкым йӧнаным ыштымаш» программе почеш эртаралтеш, кызыт «Илышлан кӱлешан инфраструктур» нацпроектыш пура. Йӱклымаш 21 апрель гыч 12 июнь марте эрта. Келшыше верым 14 ияш да кугурак-влак ойырен налын кертыт. Волонтёр-влак 2027 ийлан тӱзатышаш объект-влакым ойырен налаш полшаш тӱҥалыт.
