Нижний Новгород оласе уремлаште Йошкар-Олан 440 ияш лӱмгечыжым палемдаш толаш ӱжман билборд-влакым ужаш лиеш.
16 рекламе конструкцийым олан рӱдо ужашышкыже вераҥдыме. Эн кугужо 25*20 метр кумдыкышто вераҥын. Тушто возымо: «Не хочу ничего решать… Поехали в Йошкар-Олу за традициями народа мари, за вдохновением».
Марий Элым рекламироватлыше тыгаяк рекламе Москваштат вашке 35 вере лиеш. Марий рӱдолан лӱмгечыж нерген «Зарядье» паркыштат билборд палдараш тӱҥалеш.
Республикын спорт да туризм министрже Лидия Батюкован ойлымыж почеш, ты проект шотыштак Санкт-Петербург дене мутланымаш кая. Каласен кодыман, Йошкар-Олан лӱмгечыжым 6-11 августышто палемдаш тӱҥалына.
Рекламный щит гоч кундемнам рекламироватлыме дене пырля Марий Эл «Содружество» АО дене пырля Юл кундем федерал округысо регион-влакын транспорт средствыштым брендироватлыме пашам умбакыже шуя. А тидлан Йошкар-Ола гыч кайыше поездыште посна вагонлан национальный сыным пуат. Тӱжвачынат, кӧргыштыжат тудо ойыртемалтше: кундемнан тӱҥ тӱвыра событийже-влак, турист куатше нерген пален налаш лиеш. Тачысе кечылан кок тыгай вагоным келыштарыме. Шукерте огыл кокымшыжо Йошкар-Ола гыч корныш лектын.
С.Носова
Снимкыште: Нижний Новгородышто вераҥдыме билборд.
Фотом Спорт да туризм министерствын соцлаштыкше гыч налме.
