УВЕР ЙОГЫН

Йомак тӱнясе гай вершӧр!

Паледа, кодшо кечылаште мый адакат ялт йомак тӱнясе гай верыште лийым! Шукерте огыл гына Йӱштӧ Кугызан тыгай илемышкыже миен толынна, да куанемлан мучаш уке ыле. А кызыт – уэш!

Кушто лийынам, йодыда? Шинчам да чоным куандарыше ты вер Оршанке район Упшо селаште верланен. Республикыштына тыгай сӧрал кумдык улмо нерген але марте паленат омыл. Тиде – преподобный Сергий Радонежскийын  памашыже. Сай палымем Зоя Ивановна Семёнова деке Изи Ӧрша ялыш унала ом кай гын, тушто лийдеак кодам ыле докан. Йӧра,  унала мийыме кокымшо кечынже, кеч кас велеш гынат, памаш нерген тудо шарналтыш! Канышлан ешыж дене мӧҥгышкыжӧ толшо изирак эргыжлан мончаш пураш каяш шумо деч ончычрак кенета мане:

– Ончо, Илюш, мемнам Упшо памаш деке намиен кондо. Унам-шамыч тушто ик ганат лийын огытылыс, адакшым вӱдымат кондена да мончаште йӱштылалтына.

– Йӧра, – вигак келшыш эргыже, да ме, содор погынен, писын гына машинашке вераҥна.

Молан писын? Кече эркын кужемаш тӱҥалын гынат, эше садак пеш кӱчык: кум шагат эрталта веле – рӱмбалга. А вара шижын шукташат огеш лий – пычкемышалтешат.

Мемнанат памаш деке каяш лекмына годым кум шагатат эртен ыле. Илья вашке намиен шукташ тыршыш гынат, тиде верыш миен шумылан мландым кас рӱмбалге авалташ тӱҥалят.

Зоя Ивановна ойла:

– Памаш деке волгыдыракыште волен шуаш кӱлеш, уке гын колым ужын огыда шукто.

Могай колым, кушто ужын огына шукто – пешыже ышна умыло гынат, почешыже тарванышна. А тайыл гыч волымеке, лап верыште мемнам ослик вашлие. Тудыжо ялт чонан гай коеш! Мыняр ошкылат, тунар тӱрлӧ янлык корныштет логалеш.

– Кызыт эше тынар шукынак огытыл. А кеҥежымже мо гына уке: пий,  комбо, чыве-шамыч, йомакла гыч герой-влак. Пеледышыже мыняре лиеш! Тунамже эшеат сӧрал. Арам огыл тышке тӱрлӧ деч тӱрлӧ верла гыч еҥ-влак толедат, – ошкылмына годымак каласкалыш палымем.

Эше изиш эртымеке, Зоя Ивановна темлыш:

– А тыште колым пукшен кертыда.

Ужшаш колна-шамыч теве кушто улыт улмаш – памаш гыч йоген лекше вӱдыштӧ, пӱяште, илат. Да могай?! Тыглай огыл, а форель! Нуным ме ӱдырамашын Василиса уныкаж дене ну чот тыршен  пукшышна! Киндым кудалтымеке, кол-влакын тудым кажне гана тӧршталтен налмыштым ончен, мыят икшыве пелен ялт йочала куанышым. Вет нуныжо чылт изижак огытыл да адакшым тунар шукын улыт! Но вараже кол-шамыч тӧрштылмыштым чарнышт. Темыч, витне. Адакшым мемнан гай пукшышыжо шагалын огыл лийыныт докан.

Йывыртен, а ме Василиса дене поснак куаненна ыле, умбакыже тарванышна. Ынде мыланна утыжым вашкаш кӱлын огыл, вет эн тӱҥ шонымашнам шуктенна: колым ужынна, нуным пукшенна. Сандене корнышто ваштарешак верланыше изирак пу пӧрт деке ласкан ошкылна. Тудын деке миен шумо деч ончыч пурла велне Сергий Радонежскийын юмоҥажым вераҥдыме. Пӧртыштат, тудыжо тыглай оралте гына огыл, а чывылалташ йӧнештарыме вер, юмоҥажым, ятыр моло кӱлешан ӱзгарым келшышын шындылме. Тудо моткочак  чатка да ару – тыгай  иктешлымашым ыштышна.

Умбакыже эртет гын, памаш деке миен шуат. Тудыжо икмыняр вер гыч йыргыкта. Лач тышечак еҥ-шамыч вӱдым налын каят.

Ме вӱдымат нална, чыла вере лийна да … фотосессийым тӱҥална. Тыштат  войзалтна, туштат фотом ыштышна. Тиддеч поснаже тышеч тыглай гына мӧҥгеш тарванен каен нигузе от керт! Вет, рӱмбалгаш тӱҥалмеке, памаш кумдыкышто тулым чӱктат, да ты вер кандалге, йошкар, шӧртнялге тӱс дене каласен мошташ лийдымын сӧралын волгалтеш! Лач тиде жапыштак йомак тӱняште улмо шижмаш чоным утыр авалта!

Тиде сылнылыкше памаш воктене илыше ешын тыршымыж дене ышталтын. Кеҥежым уэш ты верыште лиям гын, а мый тышке тунам моткочак толын кайынем, вате-марий дене мутланаш тыршем. Телымсе дене таҥастарыме семын пеледыш пеледме жапыште ужде кодаш ялтак огеш лий, шонем! Кызытше кастене тургыжландараш йӧндымын чучо.

Могай нуно молодец улыт! Еҥ-влаклан тынар кугу куаным кондат, суап пашам ыштат да шке вийышт дене шочмо кундемыштым тӱзатат.

Шукынжо тиде памаш деке кумыштак, 19 январьыште, толыт, очыни. Вет Крешене йӱдым ятырынже чывылалташ йӧратат. А тыште тидлан чыла йӧным ыштыме. Арам огыл, палемдыме почеш, тымарте кажне ийын ты пайремлан тыште эсогыл кужу-у черет лиеден. Теният тыгак лиеш дыр.

Мыят каем ыле да, «я не трус, но я боюсь!» манме семын, изишак лӱдам. Кеҥежым тӧчен ончем … докан.

Любовь Камалетдинова

Авторын фотожо

Опубликовать в Одноклассники

Добавить комментарий