«Технотекс» ООО
Йодмаш кушкеш, пашаеҥ ешаралтеш
Сотнур селасе ургымо цехыште икымше гана кандаш ий ончыч лийна. Тунам тушто лу наре еҥ пашам ышта ыле. А кокымшо гана вич ий ончыч лийме годым – лучко наре. Тений мийышна гын – кумло утла. Теве кузе тудо писын кушкын толын. Но, мутат уке, вашталтыш деч посна огыл.
Тиде цехым лучко ий ончыч индивидуальный предприниматель Елизавета Ивановна Окашева почын. Неле жапыште тудо мыняр еҥлан паша верым да окса ышташ йӧным пуэн. Заказым кычалын, шкежак закройщиклан ыштен да ик эҥым веле огыл ты пашалан туныктен. Но шукерте огыл чоным почын ойлымыжо шонкалашат таратыш.
– Шоҥгемалтеш, векат – эҥертыш кӱлмым шижаш тӱҥальым. А икшывем-влак мыйын пашамым шуяш огыт келше. Кажныже шканже келшыше образованийым налын да шканже келшыше пашам муын. Сандене мый шке производствем ик палымемлан ӱшанаш келшышым. Пытартыш ийлаште Казаньысе лачак тудын вуйлатыме «Технотекс» ООО дене кылым кучен шогымо да заказышт почеш шуко спецвургемым ургымо. Вара мый шкежат тушко вончышым. Ынде кок ий утла тудлан ыштена. Мый кызыт производство вуйлатыше улам, – каласыш Елизавета Ивановна.
Тудын шке цехше тошто шыгыр зданийыште верланен ыле гын, кызыт у вуйлатышын йоҥгыдырак оралтыштыже тыршат. Санденак пашаеҥым кок пачаш шукемдаш йӧн лектын. Тусо кугу цехыште латкуд, изиште кандаш, упаковатлымаште нылыт да закройныйышто ныл еҥ ышта. Тыге чучо: тыштат тынар пашаеҥлан шыгыр. Производство вуйлатыше воктенак чоҥен шуктымо у оралтым ончыктыш.
– Шушаш жапыште ургышо кок цехге да упаковатлышыге тушко куснат. А тыште закройный гына кодеш. Вет «Технотекс» ООО эше Шарача ден Мучашъер яллаште ургымо цехлам филиал семын почын. Кажныштыже кандаш еҥ дене ыштат. Тыгак пошкудо Морко районысо Нужа ялыште шукерте огыл цехше почылто. Тушто кудытын улыт. Яллаште иктешыже 50 утла еҥ тырша. А куэмым шулмо пашам чылаштлан Сотнурысо закройный цех шукта. Санденак тудын кумдыкшым шаралташ келшыме, пашаеҥжымат ешарен налаш логалеш, векат. А пашалан йӧным кызытак мыняр-гынат саемдыме. Куэмым шулмо годым ончыч дисковый да сабельный манме кӱзыла дене гына пайдаланена ыле, ынде ленточный манмым налме. Тудын дене шуко лончым иканаште да тӧр шулаш лиеш. Такше предприятий вуйлатышына Эдуард Рауфович Мусин производствым вияҥдышашлан шуко ышта, шуко у оборудованийым налын, – ешарыш Елизавета Ивановна.
Предприятий вуйлатышын пашаже шуко гын, Казань гыч толын ыш шу. Но тыште тудын ачаже Рауф Умарович полышкалыше семын тырша. Тудо тусо авиационный институтым тунем пытарен, образованийже дене – инженер-конструктор, 20 ий вооруженный вий радамыште служитлен. Вара спецсвязь системыште ыштен, Казаньысе «Технохолод» предприятийыште исполнительный директорат лийын. Но эргыжлан полшаш кӱлмым тӱҥлан шотлен да кок ий ончыч ты пашаш ушнен.
– Эргым Эдуард Рауфович коммерческий вузым тунем пытарен да Казаньыште дилерлан ыштен. Ивановысо текстиль фабрике гыч куэмым кондымо да спецвургемым ургаш заказчикым кычалме пашам шуктен. Сотнурышто предприниматель Елизавета Окашева дене кылже сай лийын да кутырен келшыме почеш тудым пашаеҥже-влакге да оборудованийлаге шке предприятийышкыже налаш келшен. А ты оралте икмыняр ий яра шинчен. Верысе администраций дене кутырен келшымеке, тудым налме да пужен ыштыме, производствым пашаш колтымо. Вара кокымшо оралтым нӧлтымӧ. Тудат вашке ямде лиеш да пашалан йӧн ешаралтеш, – каласыш Рауф Умарович Мусин.
Тудын ойлымыж почеш, предприятий кок ий утла жапыште изи огыл ошкылым ончыко ыштен. Менеджер-влакын да директорын тыршымышт дене икмыняр у заказчикым мумо. «Казаньысе точный машиностроений завод» НПО ФКП, «Казаньысе вертолётный завод» АО, «Казаньысе кугыжаныш пычалтар завод» ФКП, «Таттелеком» ПАО дене кылым ыштыме, нунылан спецвургемым ургаш тӱҥалме. Тидын нерген палемдышыжла, тудо цехласе пашаеҥ-влакын тыршымыштымат палемдыде ыш кодо. Вет лачак нунын профессионал мастарлыкыштлан, пашам писын да сайын ыштымыштлан кӧра продукций заказчик-влак деке жапыштыже колталтеш. А кызытсе жапыште договорым кутырен келшыме семын шуктымаш бизнесыште тӱҥлан шотлалтеш.
– Директор нерген ойлаш гын, тудо ушан, чолга да шке пашажым пала. Кеч-кунамат йодышым решатлаш негызлыме вашмутым муэш, тӱҥжӧ – еҥ дене кылым муын мошта. Да пашаеҥ-влак верч тырша, нунылан келшыше условийым ышта. Сандене пашаже эшеат вияҥшаш, – иктешлен мане тудын полышкалышыже Рауф Умарович. Да меат тидымак тыланышна.
Юрий ИСАКОВ
Снимкылаште: директорын полышкалышыже Р.Мусин; производство вуйлатыше Е.Окашева; закройщик-влак Л.Сергеева ден Е.Васильева; ургымо цехыште; упаковатлыше-влак Л.Тихонова ден Л.Абакумова; ямде продукций.
Авторын фотожо
