Тыге манеш самырык-влаклан Олык Ипай лӱмеш Марий Эл кугыжаныш премийын лауреатше, «Кече-Солнышко» журналын художественный редакторжо Кристина Архипова.
– Кристина, тыйым премийым налмет дене саламлем. Ушештаре, тудым могай пашаште ойыртемалтмылан кучыктеныт?
– Премийым литератур, искусство да архитектур пашаште ойыртемалтмылан пуэныт. Комиссийыш «Бардаклюши знают, чем заняться», «Бардаклюши в поисках Деда Мороза» повесть-йомакем-влакым, «Лиза ден Роня» книга-чиялтышем аклаш луктынам. Тиде номинацийыште моткочак талантан, виян, уста еҥ-влак лийыныт, сандене сеҥышыш лектам манын мучаш марте ӱшанен омыл. Тыршымем тыге кӱкшын аклымылан чылаштлан кугу таум ойлем. Тиде умбакыжат кыртмен, шокшым кергалтен пашам ышташ тарата.
– Йомакыште ончыктымо героет-влакым тый шке шонен луктынат але илыш гыч налынат?
– «Лиза ден Роня» повестьысе геройым сайын палем. Произведенийыште улшо историй-влакым шукыжым шонен луктынам, но южо вере чынжат уло. Сӱретым шкеак ыштенам. Тыгак художник Мария Клюкина эскизем почеш южо сӱретым келыштарен. Бардаклюша-влак журналым ямдылыме гутлаште шочыныт. Мыланна колтымо серышыште ик йоча вес планетысе герой нерген возен, лач ойлымашыжлан келшыше сӱрет лийын огыл. Сӱретым интернетыште кычалаш пижынам. Шинчашкем моткочак оҥай, герой-влак логалыныт. Мылам сынышт келшен. Нунын нерген повестьым возаш шонен пыштенам. Бардаклюша-влак кӱсеныште илат, ӱчым ыштылаш йӧратат. Икымше повестьым марлаҥдыме. «Пудыранчык-влак мом ыштышашым палат» маналтеш. Тудо «Эрвий» альманахыште ӱмаште савыкталтын.
– Школым тунем пытарымеке, журналист лияш шоненат але?..
– 9-ше класс деч вара «Политехник» колледжыш тунемаш пуренам. Тушто туризм специальность дене тунемынам, кумшо курсышто улмем годым «Юлтехыште» шинчымашем ты специальность денак шуенам. Чаманен каласыман, налме профессием дене ик кечат пашам ыштен омыл. Илыш редакцийыш конден. Бауман лицейыште тунеммем годым художественный школышто тунемынам. Чон йодмо сомылем тӱҥ лийын. Тыгак мураш йӧратем. Лицейыште «Русские узоры» ансамбльыш коштынам.
– Кызыт йоча-влакым книгам лудыкташ моткочак неле. Нуно утларакшым телефонышто, компьютер ончылно шинчылтыт…
– Ме, журналын пашаеҥже-шамыч, районласе школлаш чӱчкыдын лектын коштына. Икшыве-шамычлан йомакым кузе возымо дене кылдалтше мастер-классым эртарем, повестем-влакым лудам. Нунын тӱткын колыштмышт, шинчашкем туран ончымышт, лудын пытарымеке, йодышлам пуэдымышт чонышто куан тулым ылыжтат. Нине йоча-влак варажым журналышкына серышым возат, лудашат кумылаҥыт. Тидыже пашана арам лийын огыл манын ончыкта.
– Налме сеҥымаш у кӱкшытыш нӧлталташ, кушкаш тарата. Очыни, тыйынат тыгак?
– Ик верыште шогаш ом йӧрате. Бардаклюша-влак нерген историй-влак ешаралташ тӱҥалыт. Тыгак подростко-шамычлан иктаж романым сераш шонем. «Бардаклюши знают, чем заняться» йомакем белорус йылмыш кусареныт. Тудым Минскыште «Звязда» савыктыш луктын. Книгам кумдан палыме йоча писатель Алесь Карлюкевич кусарен. Дизайным Йошкар-Олаште илыше самырык художник Полина Мосунова ыштен.
Ик ий ончыч Минскыш миен толынам. Тушто белорус серызе-шамыч дене палыме лийынам. Кызытат нунын дене кылым кучем, сандене Бардаклюша нерген кокымшо книгамат белорус йылмыш кусараш темлымаш пурен. Шонем, лишыл жапыште тиде илышыш шыҥдаралтеш. Тыгак произведениемын ик ужашыже китай йылмыш кусаралтын. Тидым кодшо ийын шыжым ышташ тӱҥалме. Тунам мый Тяньзинь оласе писатель-влакын ассоциацийыштын ӱжмышт почеш вашлиймашыште лийынам. Повестем Пекинысе кугыжаныш университетын профессоржо Вань Лу кусараш тӱналеш. Тиде сомылым мучаш марте ыштен шуктена дыр, шонем.
Лидия ШАБДАРОВА
Снимкыште: Кристина Архипова(пурла гыч кокымшо) — Тяньзинь оласе писатель-влакын ассоциацийыштын ӱжмышт почеш вашлиймашыште
Фотом еш альбом гыч налме
