Марий Эл вуйлатышын пашажым жаплан шуктышо Юрий Зайцев республикыште туныктышо организаций-влакын лӱдыкшыдымылык паспортыштым да аралалтме инженерно-технический средства-влакым уэмдыме пашам у тунемме ий тӱналтышлан шукташ кӱштен.
Республикын образований да науко министрже Лариса Ревуцкая шке докладыштыже палемден: у категорирований почеш шинчымашым пуышо организаций-влакын паспортыштым 2019-2020 ийлаште уэмдыме. Нине паспорт почеш, ятыр объектлаште лӱдыкшӧ лийын кертме нерген уверым нацгвардийын подразделенийышкыже пуышо системым шындыме, эвакуаций годым пайдаланыме системым, видеоэскерымашым да сигнализацийым шупшмо. Зданий кӧргым да йыр улшо кумдыкым частный охране предприятийын, нацгвардийын вневедомственный охране подразделенийын пашаеҥже-влак оролат.
«Терроризм ваштареш аралалтмашым эшеат чотрак пеҥгыдемдаш 2022 ийлан да план почеш палемдыме 2023 да 2024 ийлан республикын бюджетше гыч 143 миллион теҥгем ойыраш палемдыме. Тышеч 66 миллионым кучылтмо, тидыже 46 процент лиеш», – каласен Лариса Ревуцкая.
Министрын мутшо почеш, чылаже 270 паспортым ямдылыман, тачысе кечылан 40 учреждений паспортым ыштен шуктен, 234 объект кӱлешан орган-влак дене документлам пеҥгыдемдыме этапыште, 49 организаций паспортшым уэмден.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
