1 июньышто, Йоча-влакым аралыме тӱнямбал кечын, Йошкар-Олаште йоча-влаклан рӱдолан чыла гаяк каныме кумдыкыштыжо тӱрлӧ мероприятий эртен. Эн ончычак В.П.Никонов лӱмеш площадьыште Марий Элым вуйлатыше Юрий Зайцев чылаштымат пайрем дене саламлен.
«Йочалан эн тӱҥ – пеҥгыде да икоян еш. Йӧратыше ача-ава, ӱшанле йолташ да опытан наставник тудлан эреак кӱлыт. Пагалыме йолташ-влак, икшывыда-влакым аралыза, сай ошкылым ышташ полшыза, элнан патриотшым ончен куштыза. Тений кеҥеж мучко, кум тылзе жапыште, тендам тӱвыра, спорт да шуко моло мероприятий вуча. Чылашкыжат чолган ушныза. Тек кеҥеж пайдалын эрта да сай шарнымашым кода», – каласен тудо.
Регионым вуйлатыше ты кечын «Икымше-влакын толкынышт дене пырля «Марий кеҥеж» уремысе фестивальым почмо нерген увертарен. Ушештарена, тыгай мероприятий республикыштына лач Юрий Викторовичын темлымашыже почеш 1 июнь гыч 31 август марте эртаралтеш. Тений тудын кышкарыштыже чумыр налмаште 300 площадке пашам ышташ тӱҥалеш, чылаже 500 наре тӱрлӧ мероприятий лиеш: каныме парклаште — кажне кугарнян, шуматкечын да рушарнян, а изарнян – илыме верласе кудывечылаште.
Кеҥеж мучко Йошкар-Олаште районласе усталык коллектив-влак мастарлыкыштым ончыкташ тӱҥалыт. Рӱдолалан 440 ий темме лӱмеш каныш еда йоча-влаклан икмыняр кумдыкышто модаш йӧн лиеш пашам ышташ, тушко яра пуртат. Фестиваль кышкарыште уремыште кинофильмлам ончыкташ, «Таза туп» финтес-проектым илышыш пурташ, кугарня еда книгагудо площадкылам почаш да пайдале моло мероприятийым эртараш палемдыме. Тений фестивальыш тыгак Шернур сырзаводын «Сыр лавкыже» ушна.
Фестивальым торжественно почмо деч вара Чарла Кремль гыч «Ужар марафон» спорт фестиваль тӱҥалын. Тушко ушнышо-влак – изижге-кугужге – ола мучко кӧ куржын эртен, кӧ скандинав йӧн дене ошкылын. Эн кужу дистанций 10 километр лийын гын, эн кӱчык – куд метр. «Ужар марафоныш» ушнышо-влак коклаште молгунамсе семынак республикыштына кумдан палыме еҥ-влак лийыныт. Мутлан, нунын кокла гыч иктыже – Марий кугыжаныш университетын ректоржо Михаил Швецов – воктечем мардеж гаяк куржын эртыш…
Тений икымше гана «Забег в ползунках» лӱман еш таҥасымаш эртен. Тушто ик ияш марте ийготан ньога-шамыч, мутат уке, ача-авашт полшымо дене куд метрым нушкын эртеныт.
Чавайн бульвар мучко кидмастар-шамыч молгунамсе семынак шкешотан сатуштым темленыт, а Тӱвыра да каныме Рӱдӧ парк ончылно верлаш лектын коштшо «Тазалык пункт» пашам ыштен. Кумылан-влаклан вӱрыштӧ холестерин ден глюкозым тергеныт, давленийым висеныт да моло процедурым эртареныт. Тыштак терапевт консультацийым пуэн. Тушто лачак Бауман лицейын генеральный директоржо Григорий Пейсахович шинчалан перныш. Тудо тыге каласыш: «Тазалык – эн тӱҥ, сандене тудым эреак тергыман, тыге гына вияҥаш тӱҥалше черым жапыштыже чактараш лиеш». Каласыман, тыгай «Тазалык пункт»-влак рӱдоланан илыме верласе кудывечылаштыже кеҥеж мучко пашам ышташ тӱҥалыт.
Кечываллан Рӱдӧ парк гӱжлен манын каласаш гына кодеш. Кушко от ончал – йоча-влак да нунын ача-авашт. Аттракцион кумдык гын калык дене тич темын, кажнышкыже кужу черет лийын. А тудын пурымаштыже йоча-влаклан тӱрлӧ усталык мастерской пашам ыштен: сӱретле, пӱчкеде – кумыл гына лийже! Тыгодымак паркын пурла велыштыже икшыве-влаклан концертым ончыктеныт. А эше лач ты кечын Рӱдӧ паркыш 8 урым илаш колтеныт, нунылан изи «пӧртым» келыштареныт. Чыла тиде – ик Рӱдӧ паркыште гына, моло каныме кумдыкат ты кечын йоча-влаклан весела да пайдале мероприятий-шамычлан поян лийын.
Пайрем «Белка и Стрелка. Карибская тайна» мультфильмым ончыктымо да «Колесо обозрения» аттракционышто тӱрлӧ тӱс дене волгалтше шоу дене мучашлалтын.
Г.Кожевникова
Д.Речкинын/Марий Эл вуйлатышын пресс-службыжо да авторын фотошт
