«Культура» нацпроект почеш Йошкар-Олаште Рӱдӧ йоча книгагудым уэмденыт
Марий Элын рӱдолаштыже капитально олмыктымо деч вара кокымшо модельный книгагудо омсажым почын.
Библиотекым уэмдаш федерал бюджет гыч 5 миллион, муниципал бюджет гыч 4 миллион утла теҥгем ойырымо.
Чыла пӧлемым олмыктымо. Пырдыж ден туврашым уэмдыме да чиялтыме, омса-влакым вашталтыме, линолеумым шарыме. Муниципал казна гыч ойырымо окса кӱшеш санузелым, книгагудыш пурымо верым, книга-влакым аралыме тӱҥ пӧлемым ачалыме, электровоштырым алмаштыме, светильник-влакым сакалтыме.
Марий Эл вуйлатыше Ю.Зайцев библиотекыште лиймыж годым паша кузе шукталтмым ончен, тусо пашаеҥ-влак дене мутланен.
Тыште тӱрлӧ пӧлем уло: лудшым вашлийме вер, вучымо кумдык, кужемдыме кечан группылан заниматлаш, модмо ден лудмо зал-влак, компьютер класс, книгам аралыме вер – чылажат моткоч йӧнан .
Тылеч посна 8 ноутбукым, пӧлемыш вераҥдыме 2 компьютерым, интерактив панельым, телевизорым, шинчымашым пойдарыше программан интерактив ӱстелым да моло тӱрлӧ ятыр техникым налыныт. Библиотеке 1112 книгалан пойдаралтын. Тидын нерген Марий Эл вуйлатышылан Йошкар-Оласе централизованный книгагудо системын директоржо Алевтина Тараканова палдарен.
«Библиотекына 32 ий гыч уэш шочын. Тиде оралте йымак ме 1991 ийыште пуренна. Ынде чыла, эсогыл электровоштыр йотке, вашталтенна. Марий Эл правительствылан, Тӱвыра министерствылан, Йошкар-Ола администрацийлан тыгай полышым пуымыштлан кугу тау», – каласен тудо.
Тылеч вара лудшо-влакын чотышт койын шукемшаш, ӱшан дене манын Марий Эл вуйлатыше.
«Книга йочам воспитатлымаште, икшывылан личность семын кушкашыже полша. Олмыктымо деч вара пӧлемлаште йоҥгыдо, волгыдо. Библиотеке гыч кайымат ок шу, а тидыже изи лудшылан моткоч кӱлешан», – палемден Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
