Гармонь сем ончыч чыла пайремыште шоктен. Ты семӱзгарын ямле семжым колын, калыкыште манмыла, куштен моштыдымыжо тавалта, мурен моштыдымо яндар йӱкшӧ дене такмакым шергылтара. Чаманаш кодеш, пытартыш жапыште марий йӱла почеш сӱаным эртарышат шагалемын. Тидланак кӧра, очыни, гармонь йӱк уремыште шуэн йоҥгалтеш. Тиде оем дене Татарстан Республик Агрыз районысо Буймо селан шочшыжо Сергей ПАКЕЕВАТ келшыш.
– Куд ияш улмем годым гармоньым шупшкедаш тӱҥалынам. Кочам (аважын ачаже – авт.) баяным пеш сайын шоктен, ачамын шольыжат ты шотышто тале лийын. Изинекак нуным ончен, тиде сылне йӱкеш кушкынам, – воштылеш гармоньчо. – Йочасадыш коштмем годым ача-авам йошкар тӱсан «Нотка» лӱман изи гармоньым налын пуэныт ыле. Чо-отак шоктенам вет, йочасад шергылтеш ыле. Кугурак классыште тунеммем годым шем тӱсаным налын кондышт. Тудыжым пеленем Йошкар-Олашкат конденам ыле.
А кугу сценыш лекташ тӱҥалмекыже, С.Пакеев шке пашадарже дене чапле, канде тӱсан гармоньым налын. Тудын денат моткоч шуко сӱаным, шочмо кечым, лӱмгечым сӧрастарен.
– Мыняр сӱаныште лийынам – шкеат ом пале. Республик мучко веле огыл, марий-влакын тӱшкан илыме моло кундемыштат лияш логалын. Идалыкын ик пагытыштыжат йӧратыме семӱзгарем деч посна ом иле, эсогыл йӱштӧ телымат марий сӱаныште шокташ пернен, – чонжым почо Сергей.
Чолга гармонист 2015 ийыште И.Палантай лӱмеш тӱвыра да сымыктыш колледжыш тунемаш пурымекыже мурызо семын вияҥаш тӱҥалын. Репертуарыштыже 20 утла мурыжо уло. Икмыняр жап С.Пакеев «Эреҥер» калык муро ансамбльыште пашам ыштен, тӱрлӧ амаллан кӧра шукерте огыл тушеч кораҥын.
– Репертуарым эреак уэмдаш тыршем, утларакше Наталья Никифорован сылнымут корнылажлан эҥертем, – каласыш муро кумылан рвезе.
А.БАЙКОВА.
Фотом еш альбомжо гыч налме.
