Марий Элыште шуко пачеран пӧрт-влак кокла гыч 85 процент ужашыже олтымо сезонлан ямде.
3 сентябрьыште Марий Элым вуйлатыше Юрий Зайцев Экологий, технологий да атом надзор шотышто федеральный службын Юл кундемысе виктемжым вуйлатышыже Азат Мубаракшин дене вашлийын. Нуно 2024-2025 ийласе шыже-теле пагытлан ямдылалтме нерген мутланеныт.
Калык илыме да социальный сфер объект-влакым олтымо пагытлан ямдылыме паша график дене келшышын шукталтеш.
Таче кечылан шушаш шыже-теле пагытлан котельный-влак 86 процентлан ямде улыт, шуко пачеран пӧрт-шамыч – 85 процентлан, тепловой сеть-влак – 88 процентлан, вӱдпуч да канализаций сеть-шамыч – 95 процентлан.
Шуко пачеран пӧрт-влакын тӱшка погыштым капитально олмыктымо республикысе адресный программын кышкарыштыже 2024 ийыште шуко пачеран 105 пӧртым 861,8 миллион теҥгелан капитально олмыктат. Тиде паша 65 пӧртыштӧ тичмашнек шукталтын.
Тымарте 17,7 тӱжем тонн шӱйым ямдылыме, тидыже олтымо пагытлан кӱлмӧ деч 80,5 процент лиеш.
Теплоснабженийын системыжым модернизироватлыме кышкарыште республикнан ныл районыштыжо бюджет тӧнеж-влакын шым котельныйыштым пеҥгыде топливе гыч газыш кусарат, тыгак блочный модульный котельныйым чоҥат. Тылеч посна, Волжский муниципальный районышто кум котельныйым уэмден олмыктат, тыгодым тӱҥ оборудованийымат вашталтат. Объектлаште чыла пашам олтымо сезон тӱҥалме марте мучашлен шукташ палемдыме.
Калык илыме да социальный сфер объектлаште аварий ден моло инцидентым писынрак кораҥдаш ЖКХ-н организацийлаштыже 197 командым чумырымо.
Марий Элым вуйлатышын пресс-службыжын уверже негызеш Маргарита ИВАНОВА ямдылен
