16 декабрьыте Шернур район Кукнур селаште верланыше марий Йӱштӧ Кугызан илемыштыже «Йӱштӧ Кугыза, кресаньык сурт-пече» интерактивный еш программым пашаш колтат.
Тудын дене кылдалтше проект республик кӧргыштӧ да тудын деч ӧрдыж гыч толын коштмо туризм сферыште Марий Эл вуйлатышын грантше кӱшеш шыҥдаралтеш. Йӱштӧ Кугызан илемыштыже тидлан лӱмын йомакысе гаяк посна мотор пӧртым тений ыштеныт. Экскурсий деч вара тушко мийыше турист-влаклан лӱмын интерактивный программым эртараш тӱҥалыт. Тушто марий калыкын еш, илыш-йӱлаже, кидпашаже, моло ыштыш-кучышыжо, кочкышыжо дене палдараш тӱҥалыт, мастер-классым эртарат.
Ушештарен кодыман, марий Йӱштӧ Кугызан шочмо кечыжлан 22 декабрь шотлалтеш. Ты кечынат илемыш мийыше-влакым оҥай программе вуча.
Снимкыште: Йӱштӧ Кугызан илемыштыже – йомакысе у пӧрт.
Светлана Носова
Фотом Йӱштӧ Кугызан воткыл лаштыкше гыч налме.
