Тачысе унана – Кужэҥер район Йӱледӱр ялыште илыше Людмила ден Эдуард Романовмыт.
– Пелашем кызыт Моско корным тӧрлымаште пашам ышта: кок арням тушто тырша, а кок арням мӧҥгыштӧ ила. Мый кокымшо арня верысе клуб вуйлатыше улам, ныл ият пеле социальный пашаеҥлан ыштенам, пытартыш жапыште ялыштына илыше латкум илалше еҥ деке коштынам, – каласыш
– Суртна шотышто ойлаш гын, тудлан негызым 2000 ийыште ыштенна, пелашемын ачаж ден аваже полшеныт, а илашыже тушко 2007 ийыште кусненна, – каласыш Людмила Александровна.
Тудын дене пырля оралтым, пакчам ончен лекна. Игече шокшо, санденак карме-шамыч чоҥештылыт, мӱкш ызгымат шокта, а леведыш ӱмбалне шырчык шошымсо сылне мурыжым мура…
Романовмытын Денис эргышт Марий кугыжаныш университетыште тунемеш, а Диана ӱдырышт 7-ше классыште шинчымашым пога.
Пӧрт кӧргысӧ арвер, отделке шотышто озавате тыге мане:
– Кузе кертынна, туге ыштенна. Пелашем «кызыт суртым кок пачашаным да изирак кумдыканым ыштем ыле» манеш…
Ялыште туге – пашам ыштыде нимо огеш вораҥ.
– Мый кум-ныл шагат эрденак кынелам, – умбакыже мутшым шуя Людмила Александровна. – Ме эше вольыкым ашнена. Ушкална да ик вуй ӱшкыж але тунана эре уло – шыллан ончена. Тыгак шорыкым ашнена, межым шӱдырена, носким пидына. Носки шотышто ойлаш гын, пытартыш жапыште шуко пидам, молан манаш гын йодшо-влак шукемыныт.
Коеш, суртоза-влак оралтыштым чонлан келшышым ыштеныт. Мотор капка кумылым нӧлта, чатка арке волгалтеш, беседкыште канен шинчымак шуэш… Чылажымат вате-марий родо-тукым полшымо дене келыштареныт.
– Эше верандым уэмдаш шонымашна уло, каласыш Людмила Александровна.
М.СКОБЕЛЕВ
Авторын фотожо
