Ӱдырамаш-влакын тӱнямбал кечышт вашеш Марий Турек районышто Ӱдырамаш форум эртен. Тушто «тӱням вашталташ» тыршыше ӱдырамаш-влакым чапландареныт.
Районышто тыгай мероприятий тений 13-шо гана эртен. Ты форум Марий Турек районын 100 ияш лӱмгечыжлан пӧлеклалтын. «Йӱлам арален, Российнам вияҥдена» маналтын тудо. Погынышо-влакым саламлаш да, #МЫВМЕСТЕ всероссийский акцийын чолга участникше-влаклан Марий Эл вуйлатышын Тауштымашан серышыжым кучыкташ республикысе образований да науко министр Лариса Ревуцкая миен.
Тыштак пашаште сай лектышыш шумылан тыглай илышыште чолга койышым ончыктымылан да районым, кундемыште илыше калык-влакын национальный тӱвырам вияҥдымашке кугу надырым пыштымылан Ида Ивановна Крылова лӱмеш муниципал премий дене палемдымаш эртен (снимкыште). Районысо депутат-влакын погынымашыштын пунчалже почеш, тений ты премийын лауреатше-влак лийыныт: Н.П.Венценосцев лӱмеш Марий Пыламарий школын директоржо, Марий Пыламарий ял шотан илем вуйлатыше, районысо депутат-влак погынымашын депутатше, ял шотан илем вуйлатыше Елена Минина, пашан ветеранже, шуко шочшан ава, «Ошмарий-Чимарий» юмыйӱла общинын чолга еҥже Тамара Тихонова да посёлкысо сымыктыш школын туныктышыжо Валентина Филиппова.
Муниципал премийым икмыняр номинацийыште кучыктеныт. «Еш ден ӱшанлык пырля коштыт» номинацийыште пырля 50 ий утла илыше Братухинмыт, Кряжевскихмыт, Мухарлямовмыт, Устюговмыт
еш-влак палемдалтыныт. Спецоперациий дене кылдалтше гуманитарный полышым чумырышо ава волонтёр-влакым «Za Победу!», тыгак шке профессионал пашаштышт сай лектышыш шушо ӱдырамаш-шамычым «На все 100%» номинацийлаште премий вучен. Якимовмыт, Ороспаевмыт, Николаевмыт, Мухаметовмыт еш-влак тукым дене тӱрлӧ сферыште шкем сайын ончыктымылан премийым налыныт. Тыгак шуко шочшан, шке пашам почшо чолга ӱдырамаш-влакымат ӧрдыжеш коден огытыл. Марий Китне ял гыч Владислав Кибардин «Чон йодмо почеш» номинацийын лауреатше лийын.
С.Носова
Фотом районысо администрацийын сайтше гыч налме.
