4 февральыште паша дене Йошкар-Олашке миенам ыле. Вучыдымын Йылмым, сылнымутым да историйым шымлыше В.М.Васильев лӱмеш марий институтышто «Марий Эл» газетын 110 ияш лӱмгечыжлан пӧлеклалтше «йыргешке ӱстелышке» логальым.
Тушто шинчышыла, мый, эртыше жапым шарналтен, шке жапыштыже газет редакцийыште ыштыше кок еҥлан тауштышым.
1990 ий апрельыште (жапше могай писын эрта улмаш) мемнан деке Вӱрзым район Тӱм-Тӱм ялыш Йошкар-Ола гыч делегаций толын ыле. Нунын коклаште «Марий коммуна» газетын корреспондентше Василий Фёдоров лийын. Вес кечынже, мӧҥгеш кайышыла, Фёдоров мемнан деке толын коштмыж нерген «Кировская искра» райгазетыш статьям возен колташ сӧрыш. А тудын савыкталтмеке, мый дечем статьяжым, газет гыч пӱчкын луктын, шкаланже колташ йодо. Тыгак ыштышым. Тудо ийынак 24 апрельыште Василий Фёдоров мыланем серышым колтыш. Саде серышыжым тачат аралем. Тудо йодмыжым шуктымылан тауштен да шушаш 1 да 9 Май пайрем кечыла дене саламлен.
Варжым тудо мый дечем «Марий коммуна» газетлан Уржум районысо ял калыкын илышыже, оҥай увер, ойыртемалтше еҥ-влак нерген сераш тӱҥалаш темлен. Икманаш, шке йыр тыгай сынан уверым пуэн шогышо еҥ-влакым чумырен, корреспондентский постым организоватлаш, тыгак Уржум районысо ял-влакын марий лӱмыштым возен колташ йодын.
Вашмутым возен колтенам але уке – ом шарне, но ты пагыт гыч мый ончыч «Марий коммуна», варажым «Марий Эл» газетыш статья-влакым возаш тӱҥалынам. 1990 ий 27 июльышто икымше статьям савыкталте. Тудо «У еш» маналтын. Варажым «Самырык совхозын киндыже» да молат лектыныт.
Чаманен каласыман, Василий Фёдоров дене тетла вашлиялтын омыл. Статьяжат газетыште савыкталтмым чарнен. Тудын жап деч ончыч илыш дене чеверласымыж нерген пален налмеке, моткоч чаманенам.
Редакцийын вес пашаеҥжыланат – Александр Абдуловлан – тауштынем. Тудо мыланем ныл томан «Тюм-Тюм – певучий родник» книгам савыктен лукташ полшен. Шкежак редакторым, типографийым муын, корректор, верстальщик-влакым пашаш ушен. А пытартыш нылымше томжым 300 экземляр дене М.А.Кастрен лӱмеш обществын полшымыж дене лукмо. Александр Саликовичлан кугу таум каласынем да тазалыкым, у должностьышто сай паша лектышым тыланенем.
Александр Петрушин,
РФ Журналист ушемын еҥже, Киров область.
Снимкыште: Л. Григорьева, В. Мочаев да А. Петрушин
М.Скобелевын фотожо
