«Оласе средам йӧнаным ыштымаш» федеральный проект кышкарыште тӱзатышаш кумдыкым ойырышаш верч IV всероссийский онлайн йӱклымаш иктешлалтын.
Йӱклымаш тений 15 март гыч 30 апрель марте шуйнен. Марий Элысе вич муниципал образований 70 кумдыкым темлен. Йӱклымашке чылаже 52 тӱжем еҥ ушнен. Тыге 2025 ийыште тӱшка калык погыныман кандаш верым тӱзаташ тӱҥалыт: Йошкар-Олаште – 3, Козьмодемьянскыште – 2, Волжск, Звенигово олалаште да Медведево посёлкышто – 1 дене.
Йошкар-Олаште Тӱвыра да каныме рӱдӧ паркын посна кумдыкшо, Строитель уремын мужырдымо велныже йолешке-влаклан коштмо корно да «Юбилейный» микрорайонышто тротуар эн шуко йӱкым погеныт.
Проект да смете документацийым ямдылыме годым тӱзатышаш кумдыкым темлыше-влакын каҥашышт шотыш налалтеш, увертара Йошкар-Ола администраций.
Л.СЕМЕНОВА
