Таче Йошкар-Олаште МОСИ-ште верланыше кок избирательный участке кокла гыч иктыштыже специальный военный операций гыч шукерте огыл отпуск жаплан мӧҥгышкыжӧ пӧртылшӧ самырык пӧръеҥ йӱклыш.
Сайлымашке молан толаш лиймыж нерген Владимир тыге ойлыш:
– Тиде мыйын гражданский порысем. СВО кайыме кундемыште лиймеке, мемнан чын корно дене кайымынам умылымеке, шке шонымашем каласыде, йӱклыде кодын ом керт.
Владимир кызыт канаш толын гынат, йолташыже-влак дене гуманитар полышым погаш, а шушаш шочмын СВО кайыме кундемыш наҥгаяш полшаш кумылым ончыктен.
– Мый шкеат специальный военный операцийын участникше улам да палем, мо тугай тушто полышым налмаш. Эсогыл йоча деч тыглай серыш толмат – кугу куан. Мылам, мутлан, ик икшыве деч эше ӱмаштак 9 Май деч ончычак серышым кучыктеныт да тудым эре бронежилетыштем пырля нумалынам. Неле годым, а тыгай тат-влак лиеденыт, луктын лудынам да чонлан куштылгынрак чучын. Моло салтак-влакат тыгак ыштат, палем. Кызыт марте тиде серыщ лавырген, кушкедлен пытен гынат, садак моткочак шерге. А кунам лишыл еҥышт деч серыш але именной манме посылке толеш, рвезе-шамыч кузе чот йывыртат?! Передовойышто улшо пеҥгыде койыш-шоктышан боец-шамычын шинчавӱдышт лектеш! Тиде тыгай кугу полыш! – кумылжо тодылтмым шылташ тыршен, каласыш пӧръеҥ.
Л.Камалетдинова
Авторын фотожо
