Марий Элысе общественный питаний объектлаште йӱдым алкогольым ужалаш чараш палемдат.
17 июньышто Ведомство-влак кокласе пашаче группын заседанийыштыже регионысо законодательствыш алкоголь продукцийым ужалыме сферыш вашталтышым пуртымо йодышым каҥашеныт.
Тылеч ончыч Кугыжаныш Думо Российын регионжо-влаклан общепитын илыме пӧртыштӧ да тудын кумдыкыштыжо верланыше объектлаштыже алкоголь продукцийым розницыш ужалыме шотышто ешартыш чаракым пурташ правам пуымо нерген законым луктын ыле.
Марий Эл законын проектыштыже кызыт вийыште улшо чараклашке эше общественный питанийын ресторан деч моло объектлаштыже алкоголь продукцийым 23 гыч 11 шагат марте ужалаш чарыме нерген ешартышым пурташ темлыме.
Калыкым общепит заведений-влакын шуко пачеран пӧртлаште пашам ыштымыже тургыжландара.
«Мыланна тиде проблемым пайдалын решатлаш полшышо законым регион кӱкшытыштӧ лукташ кӱлеш. Тыште, мутат уке, общепитын услугыжым нарушений деч посна ыштыме сферыште бизнесым кучышо амалкалче-шамычлан зияным ышташ шонымашна уке», – палемден Юрий Зайцев.
Марий Элым вуйлатышын пресс-службыжын уверже негызеш М.ИВАНОВА ямдылен
