Лӱмгече
Йӱдвел рӱдолашке марий саламутна
Шӱм гыч лекше саламлышна чоҥештыже Ленинград кундемысе Сестрорецк олаште илыше медицине службын подполковникше, 24 ий ончыч Санкт-Петербургышто Марий землячествым чумырышо, пагалыме да аклыме Василий Васильевич Соколовлан.
17 октябрьыште тудлан 85 ий темын. В.Соколов Волжский районысо Петьял ялыште туныктышо ден медицине пашаеҥын ешыштышт шочын. Шке жапыштыже Сотнур школ директорлан ыштыше ачаже В.Соколов Кугу Отечественный сарыште вуйжым пыштен. Фельдшерлан тыршыше аважым ик ял гыч весыш колтылыныт. Тыге Василий Васильевичын йоча жапше Сотнур ден Памар селалаште, Черкысола ден Куэрсола яллаште, Звенигово районысо Эсмекплакыште эртен. 1955 ийыште Шарача кыдалаш школ деч вара Омскысо военно-медицинский училищыште (варажым Киевысе дене ушеныт), Озаҥысе кугыжаныш медицине институтышто шинчымашым поген. Василий Васильевичын чумыр паша корныжо – 50 утла ий – военный-влакым эмлыме дене кылдалтын. Вуз деч вара Эстон ССР-ысе Кингисеппыште (Сааремма отро) верланыше пограничный войскаште военный врач семын службым эртен. А 1969-2009 ийлаште, 40 ий, Санкт-Петербургышто Сестрорецкысе военный госпитальыште тыршен. Канышыш лекме деч варат 75 ийым темымешкыже врач-терапевтлан ыштен.
В.Соколов «Знак Почета» орден, «За отличие в охране государственной границы СССР», «За безупречную службу» I-ше, II-шо, III-шо степенян медаль-влак, «Отличник пограничных войск» I-ше ден II-шо степенян знак-влак дене палемдалтын.
Василий Васильевичын илышыжын утларак ужашыже да паша корныжо шочмо кундем деч торасе мланде дене кылдалтын. Туге гынат марий калык ончылно шке порысшым шижмаш чонжым туржын. 24 ий наре ончыч кугу мер пашаш пижын – Санкт-Петербургышто Марий Эл землячествым чумырен. Тунам йӱдвел рӱдолаште веле огыл, Ленинград областьыште илыше 125 марийым кычалын муын, нунын дене пеҥгыде кылым ыштен, землячествым регистрироватлен, да икымше марий ансамбльым чумыреныт. Ты мландыште икымше гана Пеледыш пайремым тудын вуйлатымыж почен эртараш тӱҥалыныт.
Пытартыш 15 ийыште В.Соколов шкенжын куд тукым ончычсо кугезыжым, тыгак пелашыжын родо-тукымжым шымлен. Йоча, школ да вуз жапысе шарнымашыже-влакым чумырен, 224 лаштыкан «Моим потомкам» книгажым ик гана огыл тӧрлен ешарен. Ты савыктышым шкешотан летопись семын аклаш лиеш. Сар деч ончыч шочшо еҥын шарнымаштыже – ятыр лӱм, факт, историй…
Пагалыме Василий Васильевич!
Сылне лӱмгечыда дене шокшын саламлена. Тыланена пеҥгыде тазалыкым, кужу-кужу ӱмырым, волгыдо да ласка илышым, вий-куатым да ӱнарым. Илыш да паша корныда дене веле огыл, мер сомылымат моштен вӱдымыда дене Те мыланна пример улыда. Тау Тыланда!
Мер Каҥаш лӱм дене Оньыжа Э.Александров
