Йошкар-Оласе Ий полатыште Россий президентым сайлымашым Эскерыше мер штабын рӱдерже тиде кечылаште йӱдшӧ-кечыже пашам ышта.
Кугу экраныште иканаште тӱрлӧ избирательный участке гыч онлайн-трансляций-влак каят. Чылаже республикыште 494 сайлыме участке почылтын, 250 гыч трансляций Эскерыше мер штабын экраныштыже коеш, молыштыжо записьым ыштат. Ий полатысе видеопырдыжым ончаш кажне кумылан еҥ пурен лектын кертеш.
Тыгак рӱдерыште автоматизироватлыме 10 паша верым келыштарыме. Тушто эскерыше волонтер-влак ыштат. Кӱлмӧ годым нуно видеотрансляцийым чарен, сайрак ончен кертыт, тидын дене рӱдерым почмо годым тудын вуйлатышыже Евгений Кузнецов палдарен.
Марий Эл мучко сайлымаш годым 1718 эскерыше пашам ышта. Нуно ончылгоч чыланат тунеммашым эртеныт.
С.Носова
