Мер пашаеҥ, ятыр ий туныктымо аланыште пашам ыштыше Владимир Унженинын «В кругу любви и вдохновенья» лӱман фотоальбомжо шукерте огыл савыкталт лектын.
Владимир Васильевич Киров кундемысе Пижан район Максиволык ялеш шочын-кушкын.
Марий йылмым, тӱвырам арален кодымашке В.Унженин кугу надырым пыштен. Тудын тыршымыж денак Киров кундемыште Марий тӱвыра рӱдерым почыныт, Пеледыш пайремым эртараш тӱҥалыныт да ятыр моло сай пашам ворандарен колтеныт.
Вачӱмбакше шагал огыл ийым пыштен гынат, В.Унженин сӱретлаш кумылаҥын. Кызыт марте шуко сӱретше погынен. Нунын гоч марий калыкын илышыже, кугезе йӱлам да тӱвырам арален, тукым гыч тукымыш шуен толмыжо, пашам йӧратымыже раш почылтыт. Сӱретлаштыже чонжылан лишыл да шерге шочмо мландыжын моторлыкшымат ончыкта.
В.Унженинын сӱрет выставкыже Киров кундемыште, Йошкар-Олаште, Москошто веле огыл, Российын тӱрлӧ регионыштыжо, эсогыл йот эллаштат эртаралтын.
– Чыла пашам чумырен, фотоальбомым лукташ шонен пыштышым, вет илыште кажне айдеме шке почешыже могай-гынат кышам кодышаш, – мане поро кумылан илалше еҥ. – Фотоальбомыш кудло утла пашам чумырымо.
Тудын пашаже-влак тӱнямбал каталогыш пурталтыныт да ЮНЕСКО-н пашаж шотышто РФ комиссий пелен материальный огыл тӱвыра поянлыкшым аралыме шотышто Россий комитетын дипломжо дене аклалтыныт.
Владимир Васильевич йоча-влакым моткоч йӧрата. Пашам ыштыме 58 ияш стажше гыч 57 ийжым йоча-влакым туныктымылан ойырен, тушечын 43 ий школым вуйлатыше лийын.
Кызыт В.Унженин Марий Ошай ялыште ила, сурт кӧргыштыжӧ шкетын тошкештеш, коклан, кидышкыже кистычкым налын, кумылжо йодмо почеш сылне сӱретлам шочыкта. Пелашыже Раисия Семёновна дене 50 ий пырля иленыт, ныл икшывым йол ӱмбаке шогалтеныт да кумда илыш корныш луктыныт. Шым уныкан коча.
А.БАЙКОВА
Авторын фотожо
