СОЦИАЛ ИЛЫШ

Йӧндымылык жаплан веле

Марий Элыште Медицине услугын регионысо порталже (Доктор12.РФ) – медицине организацийласе специалист-шамычын приёмышкышт электрон йӧн дене возалтме сервис – угыч пашам ышташ тӱҥалын.

Порталым сентябрь мучаш гыч уэмдаш тӱҥалме, сандене республикыште илыше калык врач-шамыч деке Интернет гоч возалтме шотышто икмыняр нелылык дене тӱкнен. Ынде сайт угыч пашам ышта, но тудын дене пайдаланыше-влакын шагал огыл йодышышт лектын.

Калык Марий Элын Тазалыкым аралыме министерствышкыже, Регионым виктарыме рӱдерыш да социальный сетьлаште Доктор12.РФ портал дене пайдаланыме шотышто вуйым шиеш: икте авторизироватлалтын огеш керт, весе спискыште кӱлешан специалистым огеш му, кумшо «врач уло, но тудын приёмышкыжо возалташ огеш лий» манеш…

Чынак, уэмдыме портал икмыняр йӧн дене авторизироватлалташ темла: Кугыжаныш услуго сайт гоч але обязательный медицине страхований полис полшымо дене. Но таче кечылан ик йӧн гына пашам ышта – порталыште ОМС полисын номерже ден шочмо жапым ончыктыман. Вес семын кызытеш огеш лий.

Эркын дене врач-влакын спискышт ешаралтеш. Кызытеш сервис гочын чыла специалист декак логалаш йӧн уке. Кӧн приёмышкыжо возалташ лиймым писынрак рашемдаш манын, «Услуги» вкладкыште организацийым ойырен налаш, а вара «Специалист-шамыч» кнопкым темдалаш кӱлеш. Спискыш пуртен шуктыдымо врач-шамычын фамилийышт ваштареш «Интернет гоч возалташ огеш лий» манын возымо лиеш. Но тиде йӧндымылык жаплан веле.

М.ИВАНОВА

 

Опубликовать в Одноклассники

Добавить комментарий