Мыйын мӧҥгыштем Иван Михайлович Ямбердовын тошто ботинкыже, чынрак каласаш гын, мужыр туфльыжо кия. А.И.Искандаров лӱмеш школ музейышкыда тудым пӧлеклем гын, чын лиеш, шонем. Чиен коштмо арверже семын. Вет Амстердамыште Ван Гогын тоштерыштыже тудын тошто ботинкыже-влакым аралатыс!
Иван Михайловичын каласкалымыж почеш, тиде ката дене тудо Варшава, Дрезден, Канны, Париж, Теза, Прага – икманаш, Европысо олала уремлан тротуаржым тошкен коштын. Парижыште сӱретче-влакын кумдан палыме Монмартр уремышт мучко эртен, Луврын заллаже еда коштын да Леонардо да Винчин «Монна Лиза» шедевржым ончен шоген. Мо эше оҥайже, жап эртыме семын, тиде йолчием денак Мишкан мландым тореш-кутынь тошкен. Тыште Иван Михайлович этюд ден портретлам сӱретлен, художник йолташыже-влакым у мастарлыклан кумылаҥден.
Марий Элыш пӧртылаш жап шумеке, тудо у ботинкым налын чийыш, тоштыжым йолжо гыч кудаше да шуаш ямдылалте. Ынеже пу ыле гынат, мый тудым ӱшандарен-кӧндарен йодынак нальым. Тыге тачысе марий сӱрет сымыктышын ик эн ончыл еҥже, Россий художник ушемын членже, Российын сулло художникше, Марий Эл искусствын сулло пашаеҥже да Кугыжаныш премийын лауретше Иван Ямбердовын йолчиемже мый декем кусныш. Тудым Ирсай школ музейлан пӧлеклынем. А.И.Искандаров марий калыкын чапланыше музыкантше да композиторжо семын палыме гын, И.М.Ямбердовын сӱретлаштыже марий калыкын чонжо ойла, кугезе мландына коеш. Марий сылнымутышто Сергей Чавайн классиклан шотлалтеш гын, Иван Ямбердовым сымыктышын илыше классикше манын ойлаш лиеш. Мый шкежат художник улам, сандене пеҥгыдын каласен кертам: да, тудын мартеат марий сретче-влак лийыныт, но Иван Михайлович семын радынаште марий чоным почын пуышо да кугу кӱкшытыш нӧлталше ик художникат уке.
Мыйын шонымаште, тыгай лмлӧ еҥын чиен коштмо арвержым аралаш – кеч-могай тоштерлан чап, сандене пӧлекем музейышкыда налаш йодам.
Пагалымаш дене Калитов Г.Г., художник. Уфа ола. 2010 ий 21 июнь.
Тиде серышым Башкортостан Республикын калык художникше Г.Г.Калитов Пошкырт кундем Мишкан район Ирсай ял шотан администрацийын вуйлатышыже лӱмеш возен. Чаманаш логалеш, кодшо ийын тудо илыш дене чеверласыш… Йолташыже нерген И.М.Ямбердов каласкала:
Пошкырт мландыште шочшо да илыше марий эрге Георгий Калитов дене ме у-у-у пеш чот тошто йолташ улына. Тудо мый дечем 3 ийлан кугурак, но художник-влак шке коклаштышт ийготым огыт шотло. Чот пагалыме кугу йолташем Зосим Федорович Лаврентьев мыйын шочмо кечын 87 ияш каен колтыш. Тыге илыш гыч кайымышт дене айдеме ӱмырын кӱчыкшым чот шижаш тӱҥалынам.
Георгий Калитовым шарныме лӱмеш материалым «Марий Эл» газетыште (2022 ий, 14 январь) лудса.
