Тачысе саманыште студент илыш дене тӧр ошкылшаш. Нунылан чыла вере шуктыман: тӱрлӧ семинарже, конкурсшо, лекцийже. Тыгодым кодшо курымышто тунемше-шамыч дене таҥастарымаште нунылан тунеммаште интернет полша. Тугеже кызыт студентын илышыже куштылемын але уке?
Антон Казанцев, студент, МарГУ, Аграрно-технологический институт, 2-шо курс:
– Школ дене таҥастарымаште вузышто тунемаш мыланем гын куштылгырак чучеш. Кызыт чылажымат шонен, вискален ышташ тыршет, вет тунеммаш эн ончыч шкаланет кӱлеш.
Тылеч посна школышто кажне экзамен деч ончыч чот тургыжланенам, кызыт тыгай уке. Тылеч посна преподаватель-шамычланат мемнан дене мутланаш оҥайрак, ме ынде школысо семын йоча ушан огынал, илышым вес семынрак ончена.
Мутат уке, тачысе кечын тунеммаште интернет кугун полша. Кеч-могай кӱлеш уверым писын муаш лиеш, учебникым пургед шинчаш огеш кӱл. Тылеч посна дистанций йӧн дене тунемаш лиеш.
Вероника Мустаева, блогер:
– Студент-влакын илышышт кызыт оҥайрак лийын, шонем. Шке мастарлыкым тӱрлӧ конкурсышто, форумлаште тергаш, вес кундемыш миен-толаш шуко йӧн пуалтеш. Мутлан, иктаж проектым возен, грантым налын, шонымашым илышыш шыҥдараш лиеш. Тунемше кеч-могай аланыште тыршаш тӱҥалеш гынат, тиде проект паша ончыкылыклан – кугу опыт. Лач форум-влакым гына эскерен шогыман.
Тунемме шотышто кокытеланымаш лектеш. Куштылгыжат уло: кӱлеш материал ден пособийым интернетыште муаш лиеш. Иктаж дисциплине дене шке пашатым ончыкташ презентацийым кучылташ шотлан толеш. Но уда могыржат уло. Докладым я вес материалым ме кид дене огына возо. Интернет гыч налын шындыме дене ямдылыме материал шагал годым шарналт кодеш.
Тыгак ончыч книгагудышто ме вес студент-влак дене палыме лийын кертынна. Иктаж сылнымут материал шотышто мутым вашталтенна. А кызыт книгагудыштыжат шагал еҥым ужаш лиеш. Шкежат 5-ше курсышто тунеммем годым иктаж 2-3 гана веле миенам, чай.
Туге гынат, кызыт илышын вес йодмашыже. Айдеме кеч-кунам да кеч-молан вашке тунем шуэш. Кумыл гына лийже. Тунемаш нигунам вараш огына код.
Раисия СУНГУРОВА, поэтессе, Югра кундемыште «Марий ушем» калыкле-тӱвыра рӱдер вуйлатыше:
– Интернет улмылан кӧра студентын илышыже куштылемын але уке, каласаш неле. Мо гынат, сай могыржо шуко. Интернет тачысе жапыште студентлан шуко йӧным пуа. Мутлан, мый кызыт кокымшо кӱшыл шинчымашым налам. Тунемамже Москваште, но чылаж годым тушко миен шуын ом керт, сандене дистанций йӧным кучылтам.
Тыгак кӱлеш книгам, уверым интернетыште муаш лиеш. Тыгодым чылажымат шонен кучылтман, вет курсовой але диплом пашам возымо годым плагиат уло але уке манын чот тергат.
Интернет тунеммаште полша манме ой чынжак огыл, тудо шуко йӧным пуа да мо кӱлешым писын шукташ полша. Лачак тидым моштен кучылтман.
Л.ШАБДАРОВА ямдылен
Фотом еш альбом гыч налме
