Но ик кечын, пеш писын палемдыме верыш миен шуаш кӱлешат, 20-шо маршрут дене кудалыштше газельыш шинчым. Калык шуко, салонышто шогышо-влакат ятырын улыт, самырык ӱдыр кынел шогалын, мыланем верым пуыш, тау. Вес чарналтышыште 13-15 ияшрак ӱдыр ден самырык ӱдырамаш (аваже докан) пурышт, почешышт пурышо-влак нуным покшекырак «шӱкальыч», сандене ӱдырамаш оксам вик тӱлен ыш шукто. Варажым еҥ-влак кокла гыч кок-кум гана шуялтыш, но… нигӧ ыш нал. Чылан шып улыт – йӧнан огыл, шыгыр. Мыйжат ӧрдыж гыч ончен шинчышак веле лийын кодым. Йӱкын пелештен йодашыже ӱдырамаш (ялысыла чучо) ӧрмалгыш, витне.
Кок остановкым кудална, трукышто мый дене ик радамыште улшо ик веран сиденьыште шинчыше ӱдырамашын пелйӱкын ойлымыжым кольым:
– Молан огыда тӱлӧ? Ишь, эн чоя улына манын шонат.
Мый да йочан ӱдырамаш гына тидым колна, моло нигӧ ыш кол, ыш шиж.
– Н-намысдыме-шамыч, – пӱй коклаж гыч торжан мане.
Ондак саде ӱдырамаш ӱмбак шинчам виктарышым. Ийготшо дене ни самырык, ни шоҥго от ман, ӱпшым пеш моторын поген шынден, чиемжат утыжым ковыра огыл гынат, капкылыштыже сайын шинча. Туге тарваныде, шинчам пыч ыштыде шинча, пуйто ик-кок минут ончыч умшамат почын огыл.
Вара йыштак оксам тӱлыдымӧ ӱдырамаш ӱмбак ончальым. Тудыжо… Ала вожылмыж дене, ала сырымыж дене туге тӱҥын шогалын, ӱдыржын шыпак куртко урвалтыжым шупкедымыжымат ок шиж.
– Тӱлыза! – толын шуынат, маршрутко гыч лекшыжла вес ӱдырамашет туге пенгыдын торжан каласен кодыш, пуйто контролёр веле.
Ӱдырамаш ӱдыржын кидше гыч пучла пӱтырымӧ витле теҥгеаш кагаз оксам нале да водитель дек лишемын шуялтыш. Яра вер лектат, коктынат шинчыч, но ужыда ыле гын ӱдырамашын чурийжым; кӱэмалтше, мыскылалтше, шупшылалтше.
Л.Семеновам статьяжым 2021 ий 10 сентябрьыште лекше «Марий Эл» газетын «Могай ме улына» лаштыкыштыже лудса.
