«МАРИЙ ЭЛ» ТАЧЕ

«Илышын чын сӱретшым почын пуэда»

13 январьыште савыктыш аланыште тыршыше-влак профессионал пайремыштым палемдат. А тиде – СМИ, радио, телевидений, издательстве пашаеҥ-влак. Россий печать кечылан негызым кугыжанышан икымше газетше ыштен. 1703 ий 13 январьыште Петр I кугыжан кӱштымыж почеш «Ведомости» газет ош тӱням ужын.
Таклан огыл журналистикым нылымше кучем семын ончыктат. Журналист-влак илышнан летописьшым возымо дене пырля тӱшка калыкын шонымашыжым газет, радио, телевидений гоч луктын ойлат, илышыште мо ышталтме нерген пеш писын палдараш тыршат, посна еҥ-влакым тургыжландарыше йодыш-влаклан вашмутым кычалыт. Санденак калык нунылан ӱшана. А ӱшаным сулаш куштылго огыл: шуко палыман, эре ончылно лийман. Чыла шотыштат: писе уш-акылан, чолга, лӱддымӧ, полшаш ямде, мут дене «модын» моштыман да тидын годымак тудлан оза лийман. Кажне материалже калыкын чоныштыжо йӱксавышым мужо манын, журналист тудым ойыртемалтшын ямдылышаш. Лач тыгай улыт мемнан журналистна-влак. Тачысе кечылан нуно 100 наре изданийыште тыршат.
Россий печать кечын Марий Эл вуйлатыше Юрий Зайцев республикысе журналист-влак дене правительствыште вашлийын. Тушко республикысе да районласе газет ден радио редакций, телевидений вуйлатыше-влак погыненыт. Регион вуйлатыше эн ончыч чылаштым пайрем дене саламлен. Тудын ойлымыж почеш, Интернет вияҥме пагытыште, кунам тӱрлӧ соцкыл, телеграмм-канал дене калык утларак пайдалана, СМИ садак калыклан утларак ӱшанле да чын уверым пуэн шога.
«Лач те илышын чын сӱретшым почын пуэда да калыкым курымла дене аклыме умылымаш-влак пелен лияш кумылаҥдеда: икоян лияш, шочмо элым йӧраташ, элнан историйжым палаш да пагалаш, элыштына илыше-влакым у деч у подвигым ышташ шӱкенак шогеда. Тидыже таче поснак кӱлешан, вет кызыт обществылан нацизм лӱдыкшым ыштенак шога да мемнан салтак-влак Шочмо Элын интересшым специальный военный операций кайыме кундемыште аралат», – палемден регион вуйлатыше.
2024 ийыште республик вуйлатышын кӱштымашыже почеш чыла район ден оласе СМИ-лан пашадарым тӱлаш да типографий роскотым петыраш субсидий кугемдалтын. Кодшо ийын Марий книга савыктыш 29 книгам луктын. Чумыр налмаште кугыжаныш окса полышын кугытшо 6 миллион теҥгеш шуын.
2019-2024 ийлаште илышыш шыҥдарыме национальный проект-влакын лектышыжым каҥашыме годым Юрий Зайцев палемден: пытартыш жапыште экономикын тӱрлӧ отрасльыштыже сай показательлаш шумо, бюджетат сай пойдаралтеш да калыкынат илышыже саемеш.
2025 ийыште Марий Эл угыч 12 у национальный проектыш ушна. Мутлан, 2025 ийыште Йошкар-Олаште Л.И.Соколова лӱмеш оласе йоча эмлымверын 2-шо №-ан йоча поликлиникыжым чоҥен шуктышаш улыт. Марий рӱдоласе 6-шо №-ан да 9а микрорайонлаште у школ-влакым чоҥаш тӱҥалме, 50 кудывече ден общественный кумдыкым тӱзаташ палемдыме.
Эше ик йодышыжо Отечествым аралыше-влакын идалыкыштым эртарыме дене кылдалтше лийын. Тудын шотыштак республикыште 228 кугу мероприятийым эртараш палемдыме.
«Кугу Отечественный сарын ветеранже, тылын туруженникше, сар жапысе йоча-влак деч посна ме тачысе кечын геройжо-влакымат мондышаш огынл, а тиде специальный военный операцийын участникше-влак улыт», – каласен Юрий Зайцев.
Марий Эл вуйлатышын полшымыж дене 2025 ийыште «Геройын ачаже» проектым илышыш шыҥдараш тӱҥалыт. Илышыштым шочмо элышт верч пуышо патыр-влакым ончен-куштышо да боевой действийын ветеранже-влакын портетыштым ямдылаш тӱҥалыт.
Тыгак Юрий Зайцев Кугу Сеҥымашын 80 ияш лӱмгечыже вашеш «Сеҥымаш тулсавыш» калык усталык фестивальым эртарыме нерген увертарен. Тушко республикын 17 муниципалитетше ушна.
Вашлиймаште регион вуйлатыше печать отрасльыште ойыртемалтшын тыршыше-влакым палемден. Республикысе тӱвыра, савыктыш да калык-влакын пашашт шотышто министрын алмаштышыже Михаил Матвеевлан «За заслуги перед Марий Эл» орденын медальжым кучыктен.
«Марий Эл» увер агентствын фотокорреспондентше Михаил Скобелев «Марий Эл тӱвыран сулло пашаеҥже» чап лӱм дене палемдалтын.
«Марий Эл телерадио» ГАУК-н тӱҥ режиссёржо Сергей Зубарев Марий Эл правительствын Чап грамотыжым, ты организацийынак корреспондентше Вера Горохова, Марий Турек районысо «Знамя» газет редакцийын тӱҥ редакторжо Лариса Меркушева республик вуйлатышын Тауштымашан серышыжым налыныт.
Вашлиймаш годым «Марий Элын шӧртньӧ пераже» премийым сеҥышын лӱмжым увертареныт. Тыгай пиал «Марий Эл Телерадио» ГАУК-н директоржо Ирина Фоминыхлан шыргыжалын. Тудо шке пашажым кӱкшын аклымылан да печать отрасльлан кугу тӱткышым ойырымылан регион вуйлатышылан тауштен. Ойлымыж почеш, кеч-могай уверымат чын да сайын калыкыш луктын моштыман. А тидым ышташ республикыште кучем ден СМИ коклаште вашкыл сай улмо годым лиеш.
Марий Эл вуйлатышын пресс-службыжын уверже негызеш Светлана Носова ямдылен.

Опубликовать в Одноклассники

Добавить комментарий