27 март – Театрын тӱнямбал кечыже.
Театр – чон воштончыш. Тушто уш да чон дене канаш лиеш. Куд профессионал театрыштына мотор да калыкым вашлияш чапле полатше уло. Кажныжын репертуарже тӱрлӧ темым тарватыше спектакльлан поян.
Йолташ-влак, те театрыш коштыда? Пытартыш гана могай спектакльым онченда? Театр-влакын репертуарыштышт могай спектакльым ужнеда?
Иван ЗЕМЦОВ, Тӱвыра, савыктыш да калык-влакын пашашт шотышто министерствын отделжын вӱдышӧ специалист-экспертше:
– Театрым изинекак йӧратем. Авам чыла спектакльыш коштын да мыйымат пеленже эреак налын. Кызытат пелашем дене Эрик Сапаев лӱмеш опер да балет академический театрыш чӱчкыдынак коштына. Южгунам Константинов лӱмеш руш драмтеатрышкат миен толына. Кодшо ий мучаште «Папаши» спектакльым ончаш миенна ыле, келшыш. Шкетан лӱмеш Марий драмтеатрыште режиссёр Степан Пектеевын шындыме «Гамлет. Машина. Цемент» спектакльже пеш чот ӧрыктарен. Тудым кок гана онченам да эше миен толаш кумылем уло. Тыгаяк шонымашым луктын «Паяцы» операт.
Кодшо ий октябрь гыч «Юлтех» пеленысе камер хорын баритонжо ден теноржо-влак Валерия Бесединан шындыме «Екатерина Великая» оперыштыже мурена. Ты хорышто мый шым ий улам.
Ирина КАЗАНЦЕВА, Шернур район администрацийын тӱвыра пӧлкажым вуйлатыше:
– Республикнан рӱдолаштыже улшо чыла театрышкат куанен коштам. Шукерте огыл Эрик Сапаев лӱмеш опер да балет академический театрыште чапланыше марий композитор Эллина Архипован лӱмгечыжлан пӧлеклалтше усталык касыш миенам, пеш келшен.
Утларакше Шкетан лӱмеш Марий драмтеатрыште да Марий самырык театрыште лияш й йӧратем. Репертуарыштат поян. «Алые паруса» мюзикл волгыдо шарнымашым коден. Тыгай постановко утларак лиеш гын, самырык-шамычат театрыш шукырак толыт ыле. Нунылан келшыше, проблемым почын пуышо спектакльлам шукырак сценыш лукман.
Пашаште нойымым мондаш театр полша, тыглай илышыш вашталтышым пурта.
Умбаке илаш ӱшаным ешарыше, тыгак южгунамже воштылаш да куанаш таратыше, кызытсе илышлан келшен толшо постановкым ончаш йӧратем.
Михаил БАСОВ, «Каче-влак» группын солистше:
– Жап лийме семын пелашем дене театрыш миен толашак тыршена. Утларакшым Шкетан лӱмеш театрыште лияш йӧратена. Пытартыш гана «Мӱкш отар» спектакльым онченна. Ынде «Кавасе алаша» ден «Эрла ял пайрем» премьер-влакым пеш ончымо шуэш, но жапым нигузе ойырен ом керт. «Микулан – презе, Якулан – ӱдыр» постановкат чот келшыш. Мыланна мыскара шӱлышан, муро да куштымаш дене сӧрастарыме куштылго спектакль-влак келшат.
Надежда ВАСКАНОВА, Т.Евсеев лӱмеш национальный тоштерын научно-просветительский пӧлкажын вуйлатышыже, этнограф:
– Яра жапыште театрыш кошташ кумыл эреак уло. Шкетан лӱмеш да Курыкмарий драме театр-влакын спектакльлаш кошташ йӧратем. Утларакше марий классик-влакын произведенийлашт почеш шындыме да кызытсе илышлан келыштарыме спектакль-влакым ончымо шуэш. Шукерте огыл пелашем дене «Лаксак йӹде масак» комедийым ончышна. Постановко пеш келшыш, артист-влак рольым мастарын модыт, авторын шонымашыжым келгын ончыктен моштат.
Алевтина Байкова ямдылен
Фотом еш альбом гыч налме
