«МАРИЙ ЭЛ» ТАЧЕ НОВОСТИ

«Илыше пӱртӱсын шергакан тӱняже»

Выставке

«Илыше пӱртӱсын шергакан тӱняже»

Йошкар-Олаште Россий Банкын тыгай лӱман фотовыставкыже почылтын. Тушто мемнан элысе пӱртӱсыштӧ шуэн вашлиялтше да йомын толшо янлыклан, кайыклан да моло илышылан пӧлеклалтше шӧртньӧ да ший тыгыде окса ончыкталтын.

«Йошкар книга» да «Шке тӱнянам саклена» тематике серийла дене темлыме нине фотосӱретла гоч ме художник-влакын сӧрастарыме тыгыде оксам да тушто могай животный ончыкталтмым ужын да тудын нерген пален налын кертына. Адакше тидын негызеш шкенан йырысе тӱням да пӱртӱсым аралаш кӱлмӧ нерген шоналтена, каласен выставкым почмыж годым Россий Банкын Юл-Виче тӱҥ управленийжын Марий Элысе Национальный банк-отделенийжым вуйлатыше Александр Волков.

Тудым почмаште республикнан тӱвыра, савыктыш да калык-влакын пашашт шотышто министрын алмаштышыже Михаил Матвеев лийын да художник-медальер-влакын мастарлыкыштым аклен ойлен. Художник ден скульптор-влак тыгыде оксалаште сӱретысе семынак животный-влакын моторлыкыштым, чулымлыкыштым да чаткалыкыштым ончыктеныт. Тидыже эше ик гана нунын деке порылык шижмашым ылыжта.

Россий Банк пытен кертме тӱрыш шушо янлыклан, кайыклан да моло илышылан пӧлеклалтше 150 утла тӱрлӧ тыгыде оксам таптен луктын.

Пӱртӱсыштӧ чылажат вашла кылдалтын, кажне тӱрлӧ илыше шке сомылжым шукта, сандене тиде тӱрлылыкым ончыкылык тукымлан арален кодаш кӱлеш. Теве 200 теҥге акаш тыгыде оксаште эҥерысе умдыр (бобр) ончыкталтын. Тудым, пиалешна, Марий Элыштат шуэнак огыл ужаш лиеш. Кеч кундемыштына умдыр ик гана веле огыл пытен шумо тӱрыштӧ лийын. Чапле коваштыжлан да эм шотеш кучылталтше нӧшмыжлан кӧра тудын почеш сонарленыт. Тидын нерген Илыше тӱня объектлам аралыме, эскерыме да пайдаланымым виктарыме шотышто Марий Эл департаментын вуйлатышыже Николай Шурков ушештарен.

Шарнымашан кеч-могай тыгыде оксам  шуко огыт лук, сандене тыгай выставке Йошкар-Олаште илыше да уна-влаклан тудын дене палыме лияш йӧным пуа. Выставкым Россий Банкын Юл-Виче тӱҥ управленийжын Марий Элысе Национальный банк-отделенийже зданий ончылно (Палантай урем, 67) вераҥдыме. Тудо 31 август марте ончыкталтеш.

Юрий ИСАКОВ

Снимкылаште: М.Матвеев, А.Волков да Н.Шурков – выставкым почмо годым; выставкым ончаш толшо-влак.

Авторын фотожо

Опубликовать в Одноклассники

Добавить комментарий