Марий Элыште чыла школым ӱшанле аралтышан писын ыштыше интернетыш ушымо.
Марий Эл правительствын заседанийыштыже республикысе образований системым цифраҥдыме да туныктышо ден тунемше-влаклан пайдаланашышт кызытсе электрон сервисым вияҥдыме нерген каҥашеныт.
Регионышто таче кечылан 6 йоча технопарк, 4 «IТ-куб» рӱдер, «Пилотдымо авиаций системе-влак» 17 кружок пашам ыштат. 254 тунемме верын материально-технический базыжым уэмдыме.
Образований системыште цифраҥдыме паша нерген Марий Элым вуйлатыше Юрий Зайцевлан образований да науко министр Лариса Ревуцкая каласкален. Тудын мутшо почеш, кызыт республике черетан йыжыҥыш – ик тичмаш экосистемым ыштымашке – куснен. Тушто улшо тунемме цифран платформо, сервис да контент-влак дене кажне тунемше, туныктышо да йоча пайдаланен кертшаш.
РФ Просвещений министерстве «Образование» единый платформым ыштен, тиде платформо – тӱҥ федеральный системе-влаклан шотлалтше «Моя школа» да «МАХ» национальный мессенджер дене пашам ыштыше цифраҥдыме образований сфер.
Кызытлан «Моя школа» системе дене пайдаланыме шотышто мемнан регион – «ужар» зонышто. Тунемше-влакын успеваемостьышт шотышто сведенийым «Госуслуги. Моя школа» федеральный мобильный сервис полшымо дене пален налаш лиеш, тудо «МАХ» национальный мессенджер дене ик семын пашам ышта. Кум тылзыште ача-ава ден йоча-влак коклаште приложений дене пайдаланыше 21,5 процент марте кушкын.
Республикысе туныктышо ден тунемше-влак кокла гыч 18 процентше «Универсальная библиотека цифрового образовательного контента» сервисым кучылтыт. МАХ мессенджерыште школ канал-влакын чотышт дене Марий Эл РФ субъект-влак коклаште – икымше верыште: 2026 ий 1 мартлан показатель 100 процент лийын.
Марий Элым вуйлатыше Юрий Зайцев палемден, тунемме верлам писын ыштыше интернетыш ушымо гына огеш сите, школ-влакын материальный базыштым чарныде уэмден шогыман.
«Ме моткоч писын вияҥше технологий курымышто илена. Мемнан задаче – тыглай гына илыш дене тӧр каяш огыл, а кажне йочалан тунемаш да вияҥаш икгай йӧным ыштышаш улына», – каласен тудо.
Заседанийыште республикым вуйлатыше регионысо кучем-влаклан цифран инфраструктур дене пайдаланыме дене кылдалтше пашам умбакыже шуяш, педагог-влаклан увер технологий сферыште ешартыш профобразованийым налаш йӧным ышташ, регионысо данный-влак витринылам ешарен шогымым контрольышто кучаш кӱштен. Регионышто тунемше ден ача-ава-влакым кызытсе цифран сервис дене пайдаланаш кумылаҥдыма пашам вияҥдаш кӱлмӧ шотышто палемден.
Марий Элым вуйлатышын пресс-службыжын уверже негызеш Галина Кожевникова ямдылен.
Денис Речкинын фотожо
