Фотолаштык
Илыш дене тӧр ошкылаш тыршат
Звенигово район Эсмекпляк школыш мийымына годым йоча-влак мемнам пеледыш аршаш дене вашлийыныт. Мутат уке, тиде кумылнам изишак тодылын. Коеш, тыште кугыеҥым пагалаш туныктат.
Таче кечын школышто 116 йоча шинчымашым пога. Тунемме верыш икшыве-влакым Кукшэҥер, Марий Отар, Олыктӱр, Стапан ялла гыч автобус дене шупшыктат. Мыланна тӱҥалтыш классыште эртыше урокыш пураш пиал шыргыжале. Тушто Валентина Николаевна Созонова тӱрлаш туныктен. Ӱдыр-рвезе-шамыч туныктышышт йыр мӱкшла пӧрдыныт, икте-весым йодыштыныт. Тугеже ты кидпаша нунын чоныштлан лишыл, шоналтышна семынна.
Варажым школын тоштержым ончал лекна. Тушто ятыр оҥай экспонатым чумырымо. Тоштерым историйым туныктышо Николай Рябчиков чумырен, кызыт ты пашам директор Виталий Леонтьевич Созонов шуя. Тудо школыш 1974 ийыште толын, а директорлан 28 ий пашам ышта Школ тале выпускникше-влак дене кугешна. Нунын коклаште Министр-влак советын кок вуйлатышышт Аркадий Васильев, Григорий Кондратьев, икмыняр тӱвыра министр ден тале сарзе-влак Алексей Волков, Александр Григорьев улыт. Эсмекпляк школ Социалистический Паша Герой Игнатий Романович Ямуловын лӱмжым нумалеш.
Ты школышто ятыр туныктышо династий уло. Директор Виталий Леонтьевич Созонов да тудын пелашыже. Нунын Сергей эргышт тыштак пашам ышта, пилотдымо чоҥештылше аппаратым виктараш туныкта. Тыгак Любовь Викторовна Максимова 30 ий шочмо йылмым, руш йылме ден литературым туныкта. Тудын эргыжат туныктышо тукымым шуя. Школын тале спортсменже-шамыч нергенат каласыме шуэш. Теве Василий Белкин ынде 31 ий утла школышто физкультурым туныкта.
– Мый ынде 60 ий спорт дене кылым кучем. Кажне кечын эрдене куд километрым куржын эртем, зарядкым ыштем. Тиде мылам йоча-влак дене пашам ышташ вийым пуа, – мане Василий Белкин.
Эсмекпляк школышто, федеральный программе дене келшышын, пилотдымо чоҥештылше аппаратым виктарыме классым почыныт. Тыгайже Звенигово районышто нылыт уло. Урок деч вара тунемше-влак уло кумылын ты классыш тунемаш коштыт. Тыге 5-ше гыч 9-ше класс марте 24 йоча тыгай классыште тунемеш. БПЛА-мвиктараш туныктышо Сергей Витальевич Созоновын ойлымыж почеш, кажне тунемшылан посна шкафым ыштыме. Классыште чыла оборудований, инструмент-влак улыт. Йоча-шамыч дроным погаш писын тунемыт. Иктаж ужаш пудырга гын, шапаш ужаш уло. Каласыман, занятийлаште кучылтмо квадрокоптерым Китайыште огыл, а Санкт-Петербургышто «Геоскан «Пионер» кугыжаныш предприятий луктеш. Тыге кызытсе жаплан келшыше ешартыш шинчымашым налаш шочмо школыштак йӧным ыштеныт. Тидым тачысе илыш йодеш.
Михаил СКОБЕЛЕВ,
Лидия ШАБДАРОВА
М. Скобелевын фотожо.
