Кодшо рушарнян Виче кундем Кӱльмӱжь посёлкысо «Орион» тӱвыра пӧртыштӧ «Илаш кӱлеш» кумшо марий тӱвыра фестивль эртен.
Ынде кумшо ий почела Марий Эллын сулло артисткыже Раисия Данилован мурыж гыч (мутшо Зоя Дудинан, семже Светлана Яндукован) «Илаш кӱлеш» ой мероприятийын девизышкыже савырна. Тылеч ончыч фестиваль кок ганажат Коклаялысе тӱвыра пӧртыштӧ эртен. Но фестиваль кушкеш, утларак калыкым чумыра, тушто шыгыр лийын. Сандене, участник-влакын темлымыштым шотыш налын, тений тудым райрӱдысӧ тӱвыра пӧртыштӧ эртареныт.
Пайрем кидпаша ончер-ярмиҥга дене почылтын. Марий калык вургемым, тӱрлӧ сӧрастарышым ончыктеныт, калык чес денат палдареныт. Тыштак кидмастар-влак шке ыштыш-кучышыштлан туныктеныт, мастер-класс-влакым эртареныт.
Фестивальым тудын организаторжо Нина Аркадьевна Маслова почын. Погынышо-влакым саламлаш Марий Эл гыч Марий тӱвыра рӱдер вуйлатыше Александр Бирюков миен. М.Шкетан лӱмеш Марий кугыжаныш драме театрын артисткыже Алина Егошина шке усталыкше дене куандарен да фестивальын участникше-влаклан стартым пуэн.
Чылаже 20 наре усталык коллектив, посна мурызо, нунын коклаште изирак ийготанат, лийыныт. Такмакымат, авторский мурымат йоҥгалтареныт, куштымаш дене куандареныт, шке койышышт дене зал калыкым ылыжтеныт.
Марий Эл гыч фестивалыш Марий Турек, Кужэҥер, Медведево районла, Йошкар-Ола гыч участник-влак лийыныт.
Фотом Александр Бирюковын воткыл лаштыкше гыч налме.
