Марий Элым вуйлатыше Юрий Зайцев икымше йочам ыштыше ава-влаклан икымше пӧлекым кучыктен.
Республикыштына еш-влаклан полшымо у программе илышыш пурен. Тудын кышкарыштыже икымше йочан лийше ача-ава-шамычлан пӧлекым кучыктат.
6 мартыште Юрий Зайцев Перинатальный рӱдерыш миен да тыгай пӧлек дене кок ешым куандарен. Пӧлек наборыш азам ончаш кӱлшӧ тӱрлӧ арверым: шӱртӧ кӱпшан солыкым, пледым, электрон градусникым, кленчам стерилизоватлыме приборым, пӱй лекме годым пураш пуымо погремушкым, гигиене предметым да молым – пыштыме.
«Ава лияш – кугу пиал. Тыгай куанле событий дене уло кумылын саламлем да эше шуко йочам ышташ тыланем. Республикын правительствыже икымше гана ава лийше кажне ӱдырамашлан пӧлекым ямдылен. Тыште мӧҥгыштӧ улмо икымше кечылаште кӱлшӧ чыла арвер уло. Пиалан лийза», – манын регионым вуйлатыше.
Марий Элым вуйлатышын пресс-службыжын уверже негызеш Маргарита ИВАНОВА ямдылен
