«Марий Эл» ден «Сурт-пече» газетна-влаклан 2022 ийын кокымшо пелийжылан возалтше-влак коклаште арня ончыч лотерейым эртарышна да кӧн мом модын налмыж нерген кок газетышкыжат лишыл номерлашкак возышна.
Такшым кажне гана лотерейым эртарыме годым лудшо-шамычлан веле огыл, тӱҥ приз кӧлан логалмым пален налаш мыланнат оҥай! Ты гана тиде вуймут гычак раш лийын, вет тудо тыге маналтын: «Презын озаже – Лидия Елкина!»
Модын налшыжын тыгай пиал шыргыжалме нерген кузе пален налмыж нерген теҥгече эрдене редакцийышкына толшо ӱдыржӧ Елена Анатольевна палдарыш. Тудо призым кузе налаш лийме шотышто рашемдаш пурен ыле.
– Презым модын налмына нерген эн ончычак ачам пален налын, – ойлаш тӱҥале ӱдырышт. – Тудо изарнян лекше «Сурт-пече» газетыштак тиде статьям ужын. Авам каласкала: «Кастене ачат газет-шамычым лудаш шинче да икмыняр жап гыч мыйым ӱжӧ: «Лиду, тышке тол». Молан ӱжеш, шонем. Мийышым. А тудо ойла: «Ончо: Лидия Елкина презым модын налын манын возымо!» Йӧршынак ӱшанымемла чучын огыл». Вараже мый интернетыште ончышым, кугарнян лекше «Марий Эл» газетыште возымымат ужынна да моткочак куаненна!
Тӱҥ сеҥышына, Лидия Алексеевна, 71 ияш. А ӱдырышт Йошкар-Олаштак ила да пашам ышта, сандене пӧлекым налаш тудымак миен толаш йодыныт.
– Такшым кажне ийын, газет-влаклан подпискым ыштымеке, авам вес марла газетлан возалтме квитанцийжым гына пуэн колта ыле, – палдарыш Е.Тарасова. – А ты гана эше «Марий Эл» ден «Сурт-печыланат» пуыш. Но вараже тидын монден, витне. Кугарнян авам йыҥгыртыш да ойла: «Тый квитанцийжым кушко колтенат?» «Мом пуэнат, мый адрес почеш чыла колтенам», – манам. «А молан тыге йодат?» – ӧрым. «Меже презым модын налынна да…», – эркын, шыпрак ойла. Тидын нерген пален налын да тудо чот ӧрын! «Тыйже мо тыгай ойгырышо йӱк дене ойлет? Куане!» – манам. «Эшеже ом ӱшане. Але вара меак презым налынна», – ойла.
– Мо шарнем, мӧҥгыштӧ эреак шуко газетым да журналым, ора дене манме гай, налме, – умбакыже каласкала ӱдырышт. – Кызытат ачам ден авам тӱрлӧ изданийлан возалтыт да кажне гана почто толмым куанен вучат. Ачам сулен налме канышыш лекмешкыже верысе колхозышто водительлан ыштен. Авам 40 ий Кужмарий больницыште тыршен. Ончычшо медсестра лийын, а пенсийыш лекмыж деч ончыч пытартыш жапыштыже отделенийым вуйлатен. Но але марте мыняр гана лотерейыш ушненыт, ӱмырыштышт ик ганат нимом модын налын огытыл! А тений тыгай пиал шыргыжалын! Вигак тӱҥ приз логалын!
Тудым модын налме дене Елкинмыт ешым уло кумылын саламлена! Ончыкыжымат кок газетна денат кылна тыгаяк пеҥгыде лиеш манын ӱшанен кодына.
Любовь Камалетдинова
М.Скобелевын фотожо
