Семёновка селасе 21-ше №-ан школышто ача-ава-влакын «Марий Элын ешыже таче да эрла» сообществыштын, ола администрацийын, олаште илыше да мер пашаеҥ-влакын вашлиймашышт лийын.
2024 ийым Ешын идалыкше семын увертарыме дене келшышын, республик вуйлатыше Юрий Зайцевын темлыме «Марий Элын ешыже» проект тӱҥалын. Вашлиймаш-влакым эртараш Марий Элын Кугыжаныш Погынжын депутатше-влак июньышто темленыт. Тидым республик вуйлатыше сайлан шотлен да ынде мероприятий-влак республикысе чыла муниципалитетлаште эртат.
Ты гана стратегический сессий йӧн дене Йошкар-Ола гыч 100 наре чолга ача-ава-влак икшыве-влакын лӱдыкшыдымылыкышт да тазалыкышт, еш-влаклан социальный инфраструктур да экономике – чылаже 5 теме дене йодыш-влакым каҥашеныт.
Вашлиймаш-влак деч вара темлымаш-шамычым иквереш чумырат. Тыгак еҥ-влакын йодмашыштым контрольыш налыт да йодыш-влакым решатлаш полшат.
Л.Камалетдинова
