Марий Элыште 10 июнь марте публичный колыштмаш эрта.
30 майыште Марий Элын вуйлатышыже Юрий Зайцев парламентыш 2024 ийысе республик бюджетым шуктымо нерген отчётым пуэн. Кугыжаныш Погынын бюджет да экономике политике шотышто комитетше законыш пуртымо проект шотышто публичный колыштмашым эртарыме радам ден жапым темлен, а законодательный органын президиумжо тудым пеҥгыдемден.
Документ дене келшышын, публичный колыштмаш 3 июньышто тӱҥалын да 10 июнь марте кая.
Тылеч посна Кугыжаныш Погынын президиумжо 24 апрельыште эртыше шымше сессийын иктешлымашыжым пеҥгыдемден, парламентын шушаш заседанийжым 24 июльышто эртараш палемден. Тыгак республикыште илыше икмыняр еҥым Кугыжаныш Погынын отличий знакше – «Марий Элын законодательствыжым вияҥдымашке посна надырым пыштымылан» медальже да Чапкагазше дене палемдаш пунчалын.
Маргарита ИВАНОВА
