Икте-весылан эҥертен илат
Волжский район Черкысолаште командировкышто лиймына годым Садовый уремыш корным такыртышна. Тушто ятыр у пӧрт койын. Урем тӱҥалтыште Гавриловмытын пӧртышт поснак ойыртемалтын. Тудо кок пачашан, тыгак пырдыжыште кермыч дене тӱрлӧ фигурым ыштыме, пӧрт йыр йошкарге да ош кермыч дене чатка пече меҥге-влакым оптен шындыме, садлан ялыш мийышын шинчашкыже сурт-оралте вигак перна.
Гавриловмыт деке пурымо годым озавате сурт сомылкам ыштен шогылтеш ыле. Тудо мыланна сурт-печыжым ончыктен коштыктыш. Виктор Григорьевич «Юнона» ООО-што мебельщиклан ышта, а Зоя Андреевна — сулен налме канышыште. Суртоза шке жапыштыже сварщиклан тунем лектын, ятыр ий шочмо кундемыштак тиде сомылым шуктен.
Виктор Григорьевичын мастарлыкше чыла вере шижалтеш. Тидым кудывечыш пурымо годымак ужын шуктышна. Теве пучым кадыртыме станокым вераҥдыме. Пӧрт ончылнат тӱрлӧ технике коеш. Капка воктене лумым куаш келыштарыме икмыняр кольмо шога.
Командировкыш коштмо годым суртоза-влакын автомашиналан левашым уремыштак ыштымым ятыр гана шекланенна. Виктор Гавриловат тыгак ыштен. Тудын гараж ончылныжо автомашинам шогалташ вер уло. Тидыже моткоч йӧнан да кудывечысе кумдыкым аныкла. Гавриловмыт суртыштым родо-шамыч дене ваш-ваш полшен ыштеныт. Виктор Григорьевичын изаж ден шольыжат пӧртыштым йыгыре шынденыт. Тыге, икте-весылан эҥертен, умылен илымылан куанаш гына кодеш, вет ялыште вес семын огеш лий.
Михаил СКОБЕЛЕВ,
Лидия ШАБДАРОВА
М.Скобелевын фотожо
