Тиде чолга да кумылзак ӱдыр нерген икымше гана мый радио дене колынам. Шке семынем могай молодец манын шоналтенам. Чыла вере шукта. Кушта, мер пашаш кумылын ушна, тылеч посна Йошкар-Олаште шочын-кушкын гынат, марла сайын мутлана. Мутем лаштыкнан тачысе унаже Регина МАМАЕВА нерген.
– Жапет поро лийже, Регина. Кызыт тый вузышто тунемат. Могай специальностьым налат, палыме шуэш ыле?
– Мый Марий кугыжаныш университетыште Калык культур да культур-влак кокласе коммуникаций институтышто музеологлан тунемам. 9-ше класс деч вара Марий политехнический техникумышто кыдалаш шинчымашым налынам, документовед профессийым налме нерген дипломем уло. Ссузым отличий дене тунем пытаренам.
– А мо дене тыйым музеологын специальностьшо сымыстарен?
– Тиде профессий шке энергетикыж дене кумылем налын. Тӱвыра ден сымыктыш мылам эре келшеныт. Изиэм годым пӱртӱсым, янлык-влакым сӱретлаш йӧратенам. А техникумышто тунеммем годым тоштерыш коштынна. Тушто мылам экскурсийым кузе эртарыме моткоч келшен. Санденак, очыни, тидат ты профессийым ойырен налаш шӱкалтышым ыштен.
– Тыйым шукынжо волонтёр, студотрядын чолга еҥже семын палат. Тиде пашашке кузе ушненат?
– Эше школышто тунеммем годымак мер пашашке чолган ушненам, волонтёр лийынам. Школыштат, техникумыштат тӱрлӧ мероприятийыште участвоватленам. Тазалык шотышто ойыртемалтше-влакланат полшенам.
Вузышто икымше курсышто тунеммем годым кидышкем «Кугарня» газет логалын, тушто проводник-влак нерген статья лектын. Тыге йодмашым пуэнам да наборым вученам. Мылам вашештеныт да вара 2 тылзе тунемынам. Ӱмаште кеҥеж сессий деч вара Башкирийышке, Уфа олашке, колтеныт. Тушто 2 тылзе иленам да пашам ыштенам.
– Палем, тый лагерьлаште вожатый семынат пашам ыштенат. Молан умбакыжат тиде корно дене каен отыл?
– Мутат уке, шке жапыштыже вожатыйлан пашам ышташ моткоч келшен, но варажым, проводниклан ыштен ончымекем, тиде сомыл чонемлан лишылрак улмым умыленам.
Проводникын пашаже мыйым эре ончыко каяш, кеч-могай ситуацийыште шкем кучаш, тӱрлӧ шӧрын гыч шкем шуараш, улан тунемаш таратен. Тыгак кӱртньыгорно дене поезд дене кудалме годым чонем лыплана. Окнаште койын кодшо пӱртӱсым ончен кайыме, вагонла гыч пассажир-влакын пурен-лекмыштым эскерыме мылам терапий семын улыт.
Тыгак проводниклан пашам ыштымем мылам студотрядын пашашкыже ушнаш йӧным пуэн. Теве 17 февральыште тиде толкын 65 ияш лӱмгечыжым палемден. Тидлан пӧлеклалтше мероприятий Юлтехыште эртен. Студотряд-шамыч коклаште оҥай конкурс лийын. Тудо «Сотворяй» маналтын. Проводник-влакын командышт тиде конкурсышто икымше верым налын.
– Яра жапыште ала иктаж кидпашам ыштет?
– Яра жапше мыйын уке манаш лиеш але йӧршын шагал. Шке жапыштыже кушташ, пидме кружокыш, актёр мастарлык студийыш коштынам. «Голос юности» фестивальыштат мастарлыкем ончыктенам. Ме ик группышто тунемше-шамыч дене пырля модо коллекцийнам ончыктенна. Кажне вургемжылан дизайным шке шонен лукмо, шкак ургымо.
– Рӱдолаште шочын-кушкынат гынат, марла сайын мутланет. Тиде моткоч куандара.
– Авам Шернур район Поланур ял гыч. Изи годым мый тушко чӱчкыдын кудалыштынна, каникул годым гын эре тушто иленам манаш лиеш. А коча-кова ача-авамат мый денем марла гына мутланеныт. Шочмо йылмем моткоч йӧратем, марий улмем дене кугешнем. Школышто тунеммем годым 9-ше классыште марий йылме дене оласе олимпиадыште участвоватленам, кумшо верым налынам. Марий йылмылан шӱмаҥдымыжлан туныктышем Татьяна Николаевна Гребневаланат тауштем.
– Тау тыланет чон почын вашештыметлан. Умбакыжат тыгаяк чолга, ончыко лӱдде ошкылшо, улан тунемаш ямде лийын код.
– Поро шомакланда тау, тыршаш тӱҥалам. Чолга лияш, мер пашашке ушнаш лӱдман огыл, илыш деч шукырак сайым налаш тыршыман, тыгодым жапымат пайдалын кучылтман.
А студотрядлаш ушнаш кумылан-влаклан ойлем. Марий Элыште вич направлений уло: проводник, официант, вожатый, чоҥышо-влакын, да тыгак путиный отряд-шамыч. Пытартышыже Камчаткыш заводлашке колым перерабатыватлаш коштыт. Санденак шке вийым тергаш, оксам ыштен налаш йӧн эре уло. Ит ӧркане гына.
Лидия ШАБДАРОВА
Фотом еш альбом гыч налме
