1 октябрьыште Марий Элын кандашымше гана чумырымо Кугыжаныш Погынжын икымше сессийже эртен. Тушто регионым вуйлатыше Юрий Зайцев участвоватлен.
Заседаний тӱҥалтыште Сайлымаш комиссий председательын алмаштышыже Вениамин Осокин кандашымше созыв Кугыжаныш Погыныш депутат-шамычым сайлыме иктешлымаш нерген пунчал дене палдарен.
Парламентарий-влак 19 йодышым онченыт. Нуно кандашымше созыв Кугыжаныш Погынын председательжылан тымарте Марий Эл правительстве председательын икымше алмаштышыжлан ыштыше, «Единый Россий» Всероссийский политический партийын Марий регионысо пӧлкаж деч республикысе сайлыме округ шотышто сайлалтше депутат Михаил Зиновьевич Васютиным ик йӱкын сайленыт. Парламентын у вуйлатышыже коллегыже-шамычлан тыгай кугу ӱшаным ыштымыштлан тауштен да тудым профессиональный опытшо, шинчымашыже, моштымашыж дене сулаш сӧрен. «Депутат корпусын у составше Кугыжаныш Погынын тымарте шуктен толмо чыла поро пашажым умбакыжат шуяш, республикын экономике ден интеллектуал куатшым кумдан кучылташ да вияҥдаш чыла ышташ тӱҥалеш», – ӱшандарен тудо.
М.Васютинын вуйлатымыж почеш парламентарий-влак икымше законым пеҥгыдемденыт. Тудын дене келшышын, куд депутат: председатель, председательын икымше алмаштышыже, алмаштышыже-влак кокла гыч иктыже, комитет-шамычын председательышт кокла гыч иктыже, комитет председатель-влак кокла гыч иктыжын алмаштышыже да комитет-влак кокла гыч ик член профессиональный (постоянный) негыз дене пашам ышташ тӱҥалыт.
Сессийын пунчалже почеш Кугыжаныш Погын председательын икымше алмаштышыжлан депутат Лариса Николаевна Яковлевам (Волжский ик мандатан 21-ше №-ан сайлыме округ) сайлыме, алмаштышыже-влаклан – Александр Алексеевич Смирнов («Единый Россий» партийын Марий регионысо пӧлкаж деч республикысе сайлыме округ шотышто сайлалтше депутат) ден Александр Иванович Майоровым («Единый Россий» Всероссийский политический партийын Марий регионысо пӧлкаж деч республикысе сайлыме округ шотышто сайлалтше депутат).
Вуйлатыше-влакым сайлыме деч вара депутат-шамыч парламентын пашаче органже-влакым чумыреныт: кандашымше созыв Кугыжаныш Погынын комитетше нерген положенийым пеҥгыдемденыт да нунын составыштым рашемденыт. Ынде шым комитет лиеш: законодательстве (председатель – А.Павлов), бюджет да экономический политике (М.Швецов), культур, туризм да спорт (Э.Александров), социальный политике, тазалык аралтыш да ветеран-влакын пашашт (Н.Козлова), науко, образований, национальный да молодёжный политике (Г.Пейсахович), производственный комплексым вияҥдыме (Д.Лабутин), агропромышленный комплексым вияҥдыме, экологий да пӱртӱс дене пайдаланыме шотышто (Н.Богачук).
Тылеч вара президиумын составшат рашемдалтын. Закон дене келшышын, тушко закорганын председательже, тудын алмаштышыже-влак да комитет-шамычын председательышт пурат.
Икымше сессийыште тыгак Кугыжаныш Погынын составышкыже пурышо чыла политический партий деч депутат-влакын профессиональный постоянный негыз дене пашам ыштымышт нерген пунчалым пеҥгыдемдыме. Тиде радамыш «Единый Россий» партий деч М.Васютиным, Л.Яковлевам, А.Смирновым, Н.Козловам, КПРФ деч О.Аблязовам да ЛДПР деч А.Шерстобитовым пуртымо.
Законын йодмыж почеш ныл комиссийым ыштыме. Тиде Кугыжаныш Погынын регламентым шуктымыжым эскерыме, депутат этике йодыш, Кугыжаныш Погын депутат-влакын доход, пого да пого шотан обязательстве нерген сведенийыштын чынлыкыштым эскерыме шотышто комиссий-шамыч да редакционный коллегий улыт.
Мучашлан парламентарий-влак коллегышт Сергей Мартыновым Россий Федерацийын сенаторжылан – Марий Эл Кугыжаныш Погын деч представительлан сайленыт да, тидын дене келшышын, тудын депутат полномочийжым жап деч ончыч пытареныт.
Тыге, депутат-шамыч икымше сессийыште Марий Элын ик законжым да Кугыжаныш Погынын 20 пунчалжым пеҥгыдемденыт.
«Депутат-влак кокла гыч кажныже неле корным эртен да сайлыше-шамычын ӱшаныштым сулен. Калык тендан деч сай законодательный базым, республик ончылно шогышо чыла задачым у семын решатлыме йӧн-влакым вуча. Мемнан ик корно гына – регионнам вияҥдаш да тӱзаташ, калыкнан илышыжым саемдаш», – заседанийыште чыла йодышым ончымо деч вара манын Марий Элым вуйлатыше Юрий Зайцев.
Регионым вуйлатыше специальный военный операцийыште элнан интересшым аралыше сарзе землякна-влаклан полшымо, национальный проект ден кугыжаныш программе-влакым илышыш пуртымо, муниципальный образований-шамычын экономикыштым пеҥгыдемдыме, культур ден социальный сферым вияҥдыме йодышлам эн ончыч шукташ кӱлмӧ задаче семын палемден.
Маргарита ИВАНОВА
Марий Эл Кугыжаныш Погынын пресс-службыжын фотожо
