Россий Федераций президентын 2022 ий 25 июньысо 496-шо №-ан кӱштымашыже почеш, 2 октябрь – Кыдалаш профессионал образованийын кечыже.
Тудым палемдыме кышкарышке республикнат чолган ушнен. Тиде кечылаште кыдалаш профессионал образованийым пуышо организаций-шамыч «Почмо омса» кечым, тӱрлӧ конкурсым, интерактивный ончерым, экскурсийым эртарат. «Ик йӱдым фабрикыште» Россий кӱкшытан мероприятийыште студент-влак Марий Элын ик эн ончыл предприятийлажын пашаштым ужыт. Мутлан, шукерте огыл Йошкар-Оласе строительный техникумын студентше-шамыч «Казанский Посад» ООО-н чоҥымо объектыштыже лийыныт. Организацийын прорабше, Марий Элын сулло чоҥышыжо Рево Царев техникумын 3-шо курсыштыжо тунемше-влаклан Йошкар-Олаште Калык-влакын келшымаш пӧртыштым чоҥымо объектыште экскурсийым эртарен. Тудо проект, пашаште кызытсе технологийым кучылтмо, зданийын отделкыже да, мутат уке, чоҥышын профессийже да тудын кӱлешлыкше нерген кумдан каласкален.
А теве Оршанкысе И.К.Глушков лӱмеш шуко профилян колледжыште «Повар. Кондитер» профессийлан тунемше-влакым 20 сентябрьыште верысе «Октябрь» ООО-н цехыштыже кумылын вашлийыныт. Ончыкылык пашаеҥ-влаклан экскурсийым предприятийын тӱҥ технологшо Татьяна Москвина эртарен. Тудо у оборудований, тыгак сатун ассортиментше дене палдарен, пелефабрикатым ыштыме радамым ончыктен.
Йошкар-Оласе технологий колледжыште тунемше-шамыч мебельым лукшо «Эльф» фабрикыште лийыныт, а Ялозанлык механизаций техникумын Марий Турек районысо «Кинде» ООО дене кылже пеҥгыдемеш.
Эртыше кечылаштак Йошкар-Оласе технологический колледж Йошкар-Оласе школлаште 9-ше классыш коштшо-влаклан «Почмо омса» кечым эртарен да рӱдоласе 10 общеобразовательный организаций гыч 200 наре ӱдыр-рвезым вашлийын. Нунылан техникумышто туныктышо-влак тунемме вер мучко экскурсийым эртареныт, специальность дене палдареныт, мастер-классым ончыктеныт.
Техникум ден колледжлаште шинчымашым погышо-влак тыгак Россий кӱкшытан «Ешыштем профессий историй: суперпрофессионал еш» проектыш кумылын ушненыт. Ик эн шуко ӱдыр-рвезе «Эн сай сылнымут произведений» номинацийым ойырен: конкурсыш индеш проектым колтымо, «Эн сай фотопроект» номинаций дене – шым пашам.
Кызыт республикысе кыдалаш профессионал образованийым пуышо латик организацийже «СПО-што ыштыме» Россий кӱкшытан конкурслан ямдылалтыт, тушкыжо студент гына огыл, тыгак туныктышо-шамычат ушнен кертыт. Тидын деч посна тунемше-влак студент илыш нерген роликым ямдылыме дене кылдалтше конкурсышто усталыкым ончыктат, «Идалыкын студентше – 2022» Россий национальный премийын регионысо этапшылан да шуко моло конкурслан ямдылалтыт.
Палемдыман, Марий Эл Россий кӱкшытыштӧ эртаралтше «Кыдалаш профессионал образованийын эстафетышкыже ушнен». Тыге уло эллан республикысе колледж, техникум-влак нерген кумдан палдарыме.
