Депутат-влак Марий Элыште туризмым вияҥдыме радамым акленыт.
Тӱвыра, туризм да спорт комитетын заседанийже «Вӱдлэнд Кэмп» у парк-отельыште эртен. Тиде объект республикын туриндустрийышкыже инвестицийым ыштыме сай примерлан шотлалтеш.
Мероприятий ПФО-со законодатель-влакын советыштын шушаш заседанийже вашеш эртаралтын, вет тушто округысо регионлаште кӧргӧ туризмым вияҥдыме йодышым ончаш палемдыме.
Промышленность, экономически вияҥмаш да торговльо министрын алмаштышыже Олег Сосковын увертарымыж почеш, таче туризм регионысо экономикын ик эн сайын вияҥше секторжылан шотлалтеш. 2025 ийыште республикышкына уже 1 миллион утла турист ден экскурсант толын коштын!
Отрасльлан полшымо семын предприниматель-влаклан субсидий ойыралтеш, а ялозанлык сатум ямдылен лукшо-шамыч агротуризмым вияҥдаш грантым налын кертыт. Ӱмаште Туризмым вияҥдыме шотышто агентствым почмо, кызыт тудо туризм пашам виктарыме тӱҥ структурлан шотлалтеш.
Профильный министерствын палдарымыж гыч, таче республикыштына 11 туроператор организаций ден 4 турист-увер рӱдер, 6 санаторий пашам ыштат, 151 профессионал гид-экскурсовод ден гид-кусарышым, 5 брендым официально регистрироватлыме. Шканна да уна-влаклан 280 маршрут ден экскурсий шотан программым ыштыме, общепитын 75 точкыжо, калык кочкышым темлыше 10 кафе ден ресторан пашам ыштат.
Заседанийыште туризмын тӱвыра дене палдарыме, этнографий, экологий, гастрономий да йоча видшым вияҥдаш палемдыме.
Ончыкыжым вияҥме негызлан 2030 ий марте мастер-план шотлалтеш. Тудо ныл тӱҥ кластерым вияҥдаш виктаралтын. Тудын дене пырляк транспорт инфраструктурым модернизироватлыме шотышто кугу паша шукталтеш.
Депутат ден эксперт-шамыч эше ятыр йодышым тарватеныт, нуно марий калыкын культуржо дене палдарыме, Волжскышто эҥерысе маршрутым ыштыме, экскурсовод-влакым сайын шуктымо пашаштлан кумылаҥдыме да шуко моло дене кылдалтыныт.
Маргарита ИВАНОВА
Марий Эл Кугыжаныш Погынын фотожо.
