16-22 июнь – Физический чолгалыкын кӱлешлыкше дене палдарыме арня.
Спорт ден физкультур тазалык дене чак кылдалтыныт, но кызыт айдеме тукымын илышыже палынак куштылемын: паша верыш ма вес вере тӱшка транспорт дене кудалыштына, телефон дене вашмутланымылан кӧра уналат шуэнрак кошташ тӱҥалынна, пашамат мӧҥгӧ гыч лекде ыштена, эсогыл кочкыш ден тӱрлӧ сатум курьерлан пачер але пӧрт омса марте кондыктена… Чыла тиде, мутат уке, йӧнан, но тыгодым айдеме пеш шагал тарванылеш да тидлан кӧра тазалык велым лушкен, жап деч ончыч шоҥгемын толеш.
Таза лияш, шуко илаш манын, теве мом шотыш налман:
- транспорт дене кудалме олмеш йолын ошкылза;
- паша коклаштак зарядкым ышташ жапым муза, офис йырат коштын кертыда;
- пашада компьютер дене кылдалтын гын, сурт сомылкам йол ӱмбалне шукташ тыршыза;
- кӱшыл пачашыште илыме годым лифт дене огыл, а тошкалтыш дене коштса;
- йоча-шамыч дене чӱчкыдын модса, шке коклаште мыскара шотан таҥасымашлам эртарыза, чолга модмашлашке поснак каныш кечылаште ешге ушныза;
- йӧратыме муро ден семым колыштса, почешышт куштыза;
- телефон дене мутланыме годым креслыште мойн ида шинче, пӧрт мучко але уремыште коштса;
- отпускым пляжыште огыл, а турист маршрутышто эртарыза.
Аэробный манме нагрузкым ешарыза – куржталме, писын коштмо, йолорва дене кудалыштме, баскетбол дене модмо, куштымо да ийме годым чыла гаяк чогашыл пашам ышта.
Марий Элыште спорт дене кылым кучаш, капкылым шуараш чыла йӧн уло. Тидлан келшыше инфраструктурым моткоч сайын вияҥдыме: капкыл культур да спорт аланыштыже спорт велым ямдылыме 14 организаций пашам ышта. Тушто 4,3 тӱжем утла еҥ тунемеш.
Республикыштына тыгак «Готов к труду и обороне» Всероссийский физкультур да спорт комплексын тестироватлыме 20 рӱдерже уло, нунын кокла гыч паралимпийский резерв школыштыжо начар тазалыкан граждан-влак тӱрлӧ нормативым сдатлен кертыт.
Тыгак «Корта» тунемме да тренировкым эртарыме базыште кеҥежым ече-роллер, а телым ече трассе, «Дружба» стадионышто куржталме корно ден баскетбол площадке, республикнан районлаштыже 15 ГТО площадке, Семёновка селаште, Козьмодемьянск да Волжск олалаште физкультур да тазалыкым пеҥгыдемдыме комплекс, «Авангард» рӱдерыште, «Бауманский» лицейыште да Самырык-влакын полатыштышт кум «ушан площадке» чылт яра пашам ыштат.
Палемдыме верлашке шкетын але икте-коктын веле огыл, ешгеат кошташ йӧнан да пайдале.
Надежда Фролова,
Мер тазалык да медицине профилактике рӱдерын вуйлатышыже.
Маргарита Иванова ямдылен.
