Йыван Кырла уремыште «Планета» сатулымо рӱдер шеҥгелне у сквер лийшаш. Ты пашам 2021 ийыште тӱҥалаш сӧрат. Тидын дене шукерте огыл газет лаштыкыштына палдаренна ыле.
У каныме вер Марий Элын 100 ияш лӱмгечыжлан пӧлеклалтеш. Тудо кумдан палыме марий просветитель П.П.Глезденёвын лӱмжым нумалаш тӱҥалеш. Парк проектлан «Город Йошкар-Ола» официал сайтыште 17-20 июльышто йӱклаш лиеш. Тудо радам почеш — икымше. Таче кечылан, ты кумдык лийжак манын, 200 утла еҥ кидпалым пыштен.
Кажне йӱк – шерге. Мер каҥаш марий талешкын лӱмжым нумалше каныме верым ойырен налмаш верч йӱклаш йодеш.
О.МОШКИНА