Йошкар-Оласе Суворов уремыште верланыше Полупроводник прибор завод (ЗПП) воктенысе скверлан Совет Ушемын Геройжо Александр Иванович Владимировын лӱмжым пуымо.
– Эн ондак заводын администрацийже да вуйлатышыже-влаклан, ветеран-влак советлан да профкомлан кугу таум каласыме шуэш, вет скверлан геройын лӱмжым пуаш нуно темлымашым ыштеныт, – каласен скверым пайремлын почмаште Марий Эл вуйлатыше Юрий Зайцев. – Сквер сар корным эртыше, элым аралышыла вуйым пыштыше да тыныс жапыште пиалан илыш верч тыршыше-влакым шарныме верыш савырна да ончыкыжымат тӱзлана манын ӱшанена.
Скверлан арам огыл тиде верым ойырен налме. Совет Ушем Герой А.И.Владимиров сар деч вара ЗПП-ыште 37 ий пашам ыштен. «Знак почёта» орден дене палемдалтын. Адакшым завод ончылнак «Скорбящий воин» монумент шога, тушто сарыште колышо 138 пашаеҥын лӱмжым возымо. «У скверым почмаш заводын историйыштыже кугу событийлан шотлалтеш. Сквер заводышто кызыт тыршыше-влакын каныме верышт веле огыл, а Чап кече дене кылдалтше мероприятийлам эртарыме вер лиеш. Тыге ме геройлан шкенан порыснам пӧртылтена, тидын годымак ончыкылык тукымым суапле пашашке ушена», – палемден заводын генеральный директоржо Петр Козлов.
Скверым почмаште геройын Юрий Владимиров эргыже лийын да таум каласен. Тудат ачаж семынак коло ий утла ЗПП заводышто ыштен, а чумыр династийын паша корныжо 74 ийыш погына.
СПРАВКЕ СЕМЫН
А.И.Владимиров МАССР-ын Оршанке районышто шочын. 1942 ийыште 19 ияш Йошкар Армийыш каен. Сталингард верч кредалын, разведчик лийын, Днепрым форсироватлыме годым рото дене командованийым шке ӱмбакыже налын, тушманын контратакыже-влакым чактарен. Ты подвигшылан землякнам Йошкар шӱдыр дене наградитленыт. Германий марте шуын. Йошкар площадьыште эртаралтше парадыште Александр Владимиров 37-ше гвардейский стрелковый дивизийын знамяжым нумал эртен. 5-ше ноябрьыште тудын шочмыжлан 100 ий темын.
Л.СЕМЕНОВА
