Таче Марий Эл гыч СВО-м эртарыме кумдыкыш гуманитар полышын черетан партийжым колтымо.
Мобилизоватлыме сарзе землякна-влаклан 20 тонн наре гуманитар полышым, ты шотыштак неле технике ден автотранспортлан шапаш ужашым, УАЗ автомобильым, квадрокоптер, тепловизор да картым печатлаш принтер-шамычым, погымо.
Тылеч посна эше генератор да бензопила, изоляционный материал, быт арвер, гигиенылан кӱлшӧ средстве гай озанлык сатум колтымо.
Марий Эл правительстве председательын алмаштышыже Степан Воронцовын палдарымыж гыч, регионым вуйлатыше Юрий Зайцевын кӱштымашыж почеш гуманитар полышан конвой тылзе еда чумыралтеш. Ты гана Марий Эл гыч мобилизоватлыме 650 наре сарзым медицине велым обслуживатлаш медицине оборудованиян УАЗ автомобильым колтымо.
«Юрий Викторович подразделений-влакын командирышт, СВО-н участникше-шамычлан полшымо «Элым аралыше-влак» фондын регионысо филиалжым вуйлатыше дене пеҥгыде кылым куча, кредалмаште да илышыште лачшымак мо кӱлмым рашемдаш манын, отпускыш толшо военнослужащий-влак дене вашлиеш. Чыла тидым иктешлен, грузым чумырена да гуманитар полышым кӱлеш верыш шке жапыштыже намиен шуктымым эскерена», – рашемден С.Воронцов.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
