Марий АССР-ын элгӧргӧ паша министрже, полицийын генерал-майоржо, Кугу Отечественный сарын участникше Николай Федотович Поповын илыме пӧрт пырдыжышкыже шарнымаш оҥам вераҥденыт.
Тудым почмаште Марий Эл вуйлатыше Юрий Зайцев лийын. Тудо палемден:
– Кугу Сеҥымашлан 80 ий темме вашеш ме республикнан историйышкыже кугу надырым пыштыше пагалыме еҥлан мемориал оҥам почына. Тудо уло илышыжым республикыште, элыште правопорядке верч кучедалмылан пӧлеклен.
Тыгак Юрий Зайцев ты пашам шуктымылан Марий Элысе Элгӧргӧ паша министерствылан да министр Андрей Вырвичлан тауштен.
Министрын палдарымыж почеш, Николай Федотович Попов фронтыш 19 ияш логалын да 1944 ий июнь марте НКВД-н пограничный войскаштыже служитлен. Лӱддымылыкым да героизмым ончыктымыжлан «Отечественный войнан» I ден II степенян орденже-влак дене, «Красная звезда» орден, «За оборону Москвы», «За боевые заслуги» медаль-влак дене палемдалтын.
Сар деч вара Николай Федотович Попов 43 ий утла милицийыште службым эртен. Тышеч 23 ийже Марий АССР-ын Элгӧргӧ паша министерствыжым вуйлатен.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен.
