Марий Элыште илыше-влак шке кугезыштым Яндексын нейросетьше полшымо дене муын кертыт.
Регион вуйлатыше Юрий Зайцев кодшо ий декабрьыште «Яндекс» ООО-н регион-влак кокласе вашкыл шотышто директоржо Антон Масленков дене ойпидышыш кидпалыжым пыштен. Кызыт ты документ кышкарыште образовательный проект, марла кутырымашым умылышо да синтезын технологийжым да исторический файл-влакым кычалше сервисым ыштыме паша вийым налын. Яндекс дене пайдаланыше-влаклан Марий Эл Кугыжаныш архивын фондлаштыже аралалтше метрике книга-влакым ончаш йӧн лектын. Тачысе кечылан сервисыште исторический документла гыч 450 делам вераҥдыме. Но лишыл жапыште ты чотым уэмдат.
Тыгай йӧн дене пайдаланен, шке кугезе-влак нерген уверым муаш, тукым-вожым шымлаш лиеш, а ученый-шамыч тӱрлӧ курымышто Марий кундемын эртыше илышыж гыч событий-влакым келгынрак пален налын кертыт. Яндексын нейросетьше тошто рукопись-влакымат лудеш да печатлыме текстыш савыра.
Яндексын «Поиск по архивам» сервисше 2023 ийыште пашам ышташ тӱҥалын. Тудын полшымо дене XVIII-XX курымласе кид дене возыман нейросеть дене расшифроватлыме документлаште еҥ, населённый пункт але событий-влак нерген ушештарымым муаш лиеш. Базыш Российын 20 регионысо архивла гыч 18 миллион лаштыкым чумырымо. Электрон книгагудыш «Коммерсант», «Известия», «Советский спорт» газетлам, тыгак епархийласе ведомость-влакым да моло документлам сканироватлыме савыктыш-влакым чумырымо.
Марий Эл вуйлатышын пресс-службыжын уверже негызеш Светлана Носова ямдылен
