Йошкар-Олаште эртаралтше Пеледыш пайремын ик поро йӱлаже –Пӱнчер отын тумер аланыштыже эртарыме Агавайрем. Ты кечын эр эрденак тышке Марий Элын Марий юмыйӱла ушемжын онаеҥже-влак чумыргат, кумалтышым эртараш ямдылалтыт.
Икымше гана тушко каяш тарваныше еҥ Изи Какшан эҥер воктенысе садер лоҥгаште чон ласкалыкым налме тыгай тыгай улак вер улмо нерген огытат шоналте, очыни. Тушко логалаш манын, эн ончыч вӱд воктеч, снеге пеледыш пушан олык лап дене ошкылман. Вара садер лоҥгаште изи виш гоч йолгорно дене кумалме верыш логалаш лиеш. Но тений тыште оласе администраций эҥер гоч эше йолын коштмо эше ик кӱварым ышташ пунчалын. Тудын оратажым нӧлтен шуктеныт, оҥам гына пышташ кодын. Очыни, ты кӱвар отынат шып илышыжым изиш да вашталта.
Тумер аланыште тумо веле огыл, якте пӱнчӧ-шамычат шогат. Нунын пеленак онаеҥ-влак сортам чӱктат, кумалме чесым вераҥдат. Пытартыш ийлаште кажне гана Агавайремыш мийыме годым Пеледыш пайремыш толшо делегацийла гыч еҥ-влак шукын толеденыт. Иктышт – ончаш, весышт – кумалашак. Тений сӱрет весе ыле, нуно уке гаяк ыльыч. Оньыжа Эдуард Александровын ойлымыж денат келшаш лиеш, Агавайремыш толаш ончылгоч ямдылалтман, мончашкат пурыман. Толшо уна-влакын тидым ышташ йӧныштат лийын огыл. Можыч, тыгеже сайракат…
Мо гынат Марий Элын тӱҥ онаеҥже Александр Таныгин дене пырля районла гыч толшо икмыняр онаеҥ, рат дене шогалын, кумалтыш йӱлам икшырымын, пеш ласкан шуктышт. Агавайрем – Кугу Юмын Сандалыкыште да мландӱмбалне кече, тылзе, шӱдыр-влак, кавапомышышто мардеж, пыл, кӱдырчӧ, волгенче вий-влак дене илян-шамычлан шулыкан усталык вийым ыштен шогат. Пӱртӱс вий-влак калыкналан мелын лийын, илышнам сайракым, уланракым ышташ полшышт манынак кумалыныт онаеҥ-влак.
С.Носова
Снимкыште: Агавайрем йӱлам шуктымо годым.
