Чодыра озанлык пашаеҥ-влакын профессионал пайремышт вашеш Россий ден Беларусьийын чодыра пожарым йӧртышӧ-влакын мастарлык конкурсышт луымшо гана эртен.
Тудлан вуйын Федерал «Авиалесоохрана» ден Рослесхоз агентстве шогеныт. Кум кече жапыште Моско воктенысе федерал резервын тунемме- тренировочный комплесыштыже пожарный-парашютист ден пожарный десантник-влак таҥасеныт. Беларусьийже конкурсыш нылымше гана ушнен.
Куанен палемдыман, чыла таҥасымашын лектышыже почеш «2024 ийын эн сай пожарныйже» чап лӱмым Марий Эл гыч федерал «Авиалесоохранын» Юл кундемысе пӧлкажын парашютно-пожарный группыжын инструкторжо Марсель Турсунов сеҥен налын. Тудо ты пашаште 2012 ий гыч ышта. Тул ваштареш Мӱндыр Эрвелыште, Сибирьыште, Уралыште, элнан кечывалвел округыштыжо, тыгак Чукоткышто, Якутийыште, Забайкальский, Красноярский крайлаште, Бурятийыште, Иркутск ден Свердловск, Курган, Ростов, Волгоград областьлаште кучедалын. Теве конкурсышкат тудо Якутий гыч вигак миен.
С.Носова
Снимкыште: М.Турсунов.
Фотом Россий МЧС-н Марий Элысе Тӱҥ управленийжын сайтше гыч налме.
