ЙОШКАР-ОЛА

Эн мотор да йӧратыме Йошкар-Олана тек умбакыжат тӱзлана!

Йӧратыме Йошкар-Оланалан 439 ий теме. Шочмо кечыже тений моткоч кумдан палемдалте. Чылаже 35 вере тӱрлӧ деч тӱрлӧ мероприятий эртаралте. Адакшым пайремжат ныл кече, 3 гыч 6 август марте, шуйныш!

Программе чот поян ыле, сандене чыла ийготан еҥат: изижат, кугужат, илалшыжат – шканже келшыше мероприятийыш миен да чонжым куандарен кертын. Мутлан, икшыве-шамычлан кажне гаяк площадкыште могай-гынат модыш але весела программе, викторине, конкурс лийын. Теве шуматкечын, каныш кечым ончыде, оласе рӱдӧ каныме паркыште 9 шагат эрталтымекак нуно мураш, кушташ тӱҥалыныт ыле да юарлыме йӱкышт ала-кушко шумеш шоктыш. Да тушто кечыгут манме гаяк нунылан ямдылыме оҥай программе-влак вученыт: «Бодрая Йошка» зарядке, «Лунтик на день варенья», «В гостях у Парковичка» театрализоватлыме модыш представлений-влак, «Маленькие таланты» концерт, «Городки» модмаш… Тыгак икшыве-шамыч «воздушный змейым» колтымашке, «Динамо» стадионышто чия фестивальыш, ача-авашт дене пырля, изиш кугуракышт поснат, концертлашке, ончерлашке миен толын кертыныт. Теве Ленин лӱмеш площадьыште шуматкечын 9 шагат эр гыч 16 шагат марте ретроавтомобиль выставке лийын. Туштыжо могай-гына маркан машина, тыгак мотоцикл уке ыле?! Нунын йыр ньога-шамыч веле огыл, молат, поснак рвезе ден пӧръеҥ-влак, ну вет пӧрдыч, воктекышт шогалын фотографироватлалтыч!

Шуматкечын 9 шагатланак Чавайн бульварыште «Мастар-влакын олашт» почылто. Тушто утларакше тале кидмастар-шамыч шке пашаштым ончыкташ да ужалаш луктыныт ыле. Тыгодым коклаштышт йоча-шамычат койыч. Мутлан, ик вере, бульвар тӱҥалтыштак, иктаж 7-8 ияш ӱдыр-влак, шер гыч ыштыме кидшолым, шергашым, шӱшерым, магнитик-шамычымым луктын оптеныт ыле. Могай сай, вет нуно кидпашамат изинекак ышташ тунемыныт, яра жапыштымат арам огыл, а пайдалын эртарат. Адакшым мо кӱлешлан оксамат мыняр-гынат ыштен налыт.

Южышт концертым ончен веле огытыл, а тушко шкештат ушненыт. Теве Ленин площадьыште 5 августышто лийше «Йошкар-Ола – чевер ола» марий эстраде да фольклор концертыште тӱрлӧ ансамбльышке коштшо икшыве-шамычым ончаш моткоч келшыш. Чапланыше мурызо ден вес коллектив-влакат, мом ойлаш, сылнын мурышт, куштышт. Но йоча-шамыч кумылым ала-кузе поснак савырен моштат. А погынышо калыкым концерт жапыште Йошкар-Олан кечыж дене олан мэрже Евгений Маслов ден Марий Эл кугыжаныш Погын депутат, Марий тӱвыра рӱдер вуйлатыше Наталья Пушкина саламлышт.

Ака-изаштынат шке мастарлыкыштым ончыкташ йӧнышт лийын.  Республикын да Шнуй Дева Мариян площадьыштышт, Никонов площадьыште, Ленин лӱмеш тӱвыра полат ончылно да эше ятыр площадкыште эртаралтше концертлаште тидым ыштен кертыныт. Кумылан-влак С.Г.Чавайнлан памятник воктене «Йошкар-Олан поэзийже» поэтический площадкыште почеламутым лудыныт, туштак «Интеллектуальная карусель» мероприятийыш ушненыт. Лӱддымырак да чолгарак ӱдыр-рвезе-шамыч воркаут, паркур, скейтбординг, самокат дене показательный выступлений-влакым онченыт веле огыл, шкештат мастарлыкыштым ончыктеныт.

А «Обними Йошкар-Олу» оласе тӱшка акций, «В ритме города» куштымаш акций кузе чот веселан эртеныт?! Тушко утларакше, мутат уке, самырык-шамыч ушненыт. Мут толмашеш палемден кодаш гын, куржталаш йӧратыше-влакын «Айвика» клубыштым вуйлатыше, 25 ий стажан марафонец Иван Земцов Йошкар-Олам «ӧндалше-влак» йыр рӱдолан тистыж дене куржын савырнен да тиде маршрутшо 1,5 км наре кужытыш шуын!

Чарла кремлят могай-гына мастер-классым, концерт да спорт програмым, «королевский» ӱстембал да вес сынан модмашым, шовын шоҥ шоум ямдылен огыл?! Теве рушарнян тушто тунар калык ыле – кӧм да кушко ончашат ӧрынна. Шинча шарлен! Вет ик вере зарядкым тӱшкан ыштат, вес вере кочкышым ямдылаш туныктымо мастер-класслаште ятырын улыт ыле. Тӱрлӧ кафе ден организаций-влакын темлыме сатуштым тамлен ончаш кумылан-шамычат чыла вереат изи огыл черетыште шогеныт. А кӧ чыла тидым ыштен да ноен гын, ужар шудышкак волен шинчын, каналтеныт. Тыгайышт моткоч шукын улыт ыле. Поснак – кастене.

Кеч-могай ийготан еҥ-влак оласе тоштерлашке, нунын эртарыме экскурсийлашке миен толын кертыныт. Мутлан, кӧ лийын гын, шукыштлан Матрена Корепова дене пырля Воснесенский урем мучко кошташ да ожнысо олана нерген утларак пален налаш оҥай лийын, очыни. Мый телевизор дене изирак ужашым веле онченам гынат, моткоч келшен. Вет экскурсоводшо тыглай вургемым огыл, а ондаксым чия! Да тыге шке тӱжвал сынже денак вигак пуйто тунамсе жапыш «наҥгая»!

Оҥай лийын докан «Царевококшайск: по ту сторону света» мистический экскурсийыш коштын савырнаш. Конешне, южо увержым пален налмеке, южо верышкыже тылеч вара каяшат лӱдмашанын чучеш дыр. Но вет палашыже оҥайыс! Эх, жалке, миен шуын омыл. Тиде жапыште мый вес кумда мероприятийыште лийынам…

Йошкар-Ола мучко троллейбус дене экскурсийыш лекташат еҥ-влаклан пайдале лийын. Но тушкыжо кӧ ончылгоч возалтын, тудо веле логал кертын.

А теве парашютист-шамычын Российын, Марий Элын тистыштым, Йошкар-Олан гербшым волтымыштым чылан ончен кертыныт. Санденак Изи Какшан эҥерын кок вел серышкыжат 15 шагат деч вара калык моткоч шуко погынен!

Канатыште коштшо-шамычын выступленийыштым ончышо-шамычат ятырын лийыныт.

Рӱдӧ каныме паркыште духовой оркестрын шоктымыж почеш «Танцуй и пой, мой город» каныме кас лийын. Тыгайже кажне ийын эртаралтеш, да тушко тӱҥ шотышто илалшырак-влак чумыргат. Сандене коча ден кова-шамычланат   жапыштым веселан эртараш йӧн пуалтын.

Ой, чылажым радамлен пытарашат огеш лий ала-мо. Утларак кумда тӱшка мероприятий-влак нерген умбакыже кугарня номерыште каласкалена.

А кызыт эше ик эн тӱҥ ужаш нерген ойлена. Йошкар-Олан шочмо кечыж дене Марий Эл вуйлатыше Юрий Зайцевын саламлымашыжым республикысе правительстве председательын икымше алмаштышыже Михаил Васютин шуматкечын Ленин площадьыште тидлан пӧлеклалтше торжественный мероприятийым почмаште лудын пуыш. А кастеныже кумдан палыме рок мурызо Ольга Кормухинан концертше деч ончыч Патриарший площадьыш Марий Элын вуйлатышыже Юрий Зайцевсаламлаш шкеже толын ыле. Тудо тыге ойлыш:

– Пагалыме йолташ-влак, нине кечылаште мемнан рӱдоланалан 439 ий темеш. Самырык, чевер, но тыгодымак тендан-влак дене, тыште илыше-влак дене, мудреч, тендан гаяк мотор олана. Пайрем дене уло кумылын саламлем. Ӱшанем: олана, рӱдолана эшеат мотор, сайрак, мландӱмбалне эн сай ола лийже манын, ме тендан дене чылан пырля уло вийнам пыштена!

Тыршаш тӱҥалына! Туге, вет лудшына-влак?..

Любовь Камалетдинова

Авторын фотожо

Опубликовать в Одноклассники

Добавить комментарий