Марий Эл вуйлатыше Юрий Зайцев Госсоветын заседанийышкыже ушнен. Тудым Россий президент Владимир Путин эртарен.
Заседаний Россий Федерацийыште еш-влаклан полшымо йодыш-влаклан пӧлеклалтын. Владимир Путин 6 %-ан еш ипотекым арален кодаш да вторичный жильем налаш кучылташат йӧным ышташ темлен. Тыгак тудо ава-героиня-влаклан РФ-н Паша Геройжо льгот дене пайдаланаш йӧным ыштыме нерген увертарен.
Эл вуйлатышын палемдымыж почеш, еш-влаклан полшымо шотышто эртыше идалыкыште ятыр ышталтын.
– Еш йӱлам аралыме да вияҥдыме шотышто пашам умбакыже шуйыман да шуко шочшан еш-влаклан кугу тӱткышым ойырыман, – каласен президент.
Марий Элыште 292,1 тӱжем еш ила, тышеч 207,8 тӱжем ешыже ола округлаште, 84,3 тӱжемже яллаште илат. Регионыштына шуко шочшан еш статусан 12,9 тӱжем еш уло. Тышеч 82 % – кум шочшан. Республикыштына эн кугу еш – 15 икшыван.
Нунылан полшымо ик эн тӱҥ направленийлан «Демографий» нацпроектын «Финансовая поддержка семей при рождении детей» региональный проектым илышыш пуртымо шотлалтеш. Тудын дене келшышын 2022 ий годсек кумшо да шукырак икшывым ыштымылан тылзе еда выплате, тыгак кумшо йоча шочмеке региональный ава капитал тӱлалтыт.
Единовременный ава капиталын кугытшо кажне ийын индексироватлалтеш. 2023 ийыште тудо 76 514 теҥге лийын гын, тений – 82 177 теҥге.
Тений тиде выплатым да ава капиталым тӱлаш бюджетыште 406,8 млн. теҥге палемдалтын. 9 тылзыште тиде оксам 2,8 тӱжем еш налын, тышеч 579 – ава капиталым.
2024 ий январьыште Россий президент Владимир Путин шуко шочшан еш-влакын статусыштым федерал кӱкшытыштӧ пеҥгыдемдыме да нунылан могай полышым пуымым палемдыме указым подписатлен.
Марий Эл вуйлатыше Юрий Зайцевын темлымыж почеш тений мартыште «О многодетной семье в Республике Марий Эл и мерах по её социальной поддержке» республиканский законым приниматленыт.
Госсоветын заседанийыштыже Владимир Путин спецоперацийын участникше да коча-кова, кугезе коча-кова-влакын подвигыштым шарныме лӱмеш 2025 ийым Элым аралышын идалыкшылан увертарен.
Марий Эл вуйлатыше Юрий Зайцевын ойлымыж почеш, тиде – россиян-влакым шочмо элым йӧраташ, исторический чынлыкым арален кодаш, самырык-влакым патриотизм шӱлышеш кушташ иквереш ушаш полшышо моткоч кӱлешан ошкыл.
– Уло эл дене пырля Марий Эл кугыжанышнан вий-куатшым пеҥгыдемдымашке шке надыржым ышта. Кызыт боецна-влак элнан интересшым специальный военный операций кайыме верыште кӱлын аралат, боевой задаче-влакым шуктымышт годым лӱддымылыкым да героизмым ончыктат, – палемден Юрий Зайцев.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
